सानो, कांतो (जपान) : भारतीय संघाचा सलामीवीर अभिषेक शर्मा जपानविरुद्धच्या टी-२० सामन्यात पहिल्याच चेंडूवर खाते न उघडता बाद झाला. या ‘गोल्डन डक’मुळे अभिषेकच्या नावावर एका नकोशा विक्रमाची नोंद झाली आहे.
वर्ष २०२६ मध्ये तो दहाव्यांदा शून्यावर बाद झाला असून, आंतरराष्ट्रीय टी-२० क्रिकेटच्या इतिहासात एकाच वर्षात १० वेळा शून्यावर बाद होणारा तो जगातील पहिलाच फलंदाज ठरला आहे. विशेष म्हणजे, याआधीच्या सामन्यात अफगाणिस्तानविरुद्ध अभिषेकने शानदार शतक झळकावले होते.
या ‘गोल्डन डक’सह अभिषेक शर्माने दोन दिग्गज खेळाडूंना मागे टाकले आहे. टी-२० क्रिकेटमध्ये एका वर्षात सर्वाधिक वेळा शून्यावर बाद होण्याचा नकोसा विक्रम आता त्याच्या नावावर जमा झाला आहे. यापूर्वी अफगाणिस्तानचा रशीद खान (२०१९) आणि पाकिस्तानचा शादाब खान (२०२४) हे प्रत्येकी ९ वेळा शून्यावर बाद झाले होते. याशिवाय, आंतरराष्ट्रीय टी-२० मध्ये सर्वाधिक वेळा ‘गोल्डन डक’वर बाद होणारा अभिषेक हा पहिला भारतीय सलामीवीर ठरला आहे. तो आतापर्यंत ५ वेळा पहिल्याच चेंडूवर बाद झाला असून, रोहित शर्मा ४ वेळा अशा पद्धतीने बाद झाला होता. या बाबतीत त्याने रोहित शर्माचा विक्रम मोडला आहे.
अभिषेक शर्मा - ५
रोहित शर्मा - ४
संजू सॅमसन - ३
के. एल. राहुल - २
मुरली विजय - १
भारत आणि जपानदरम्यान खेळवला गेलेला हा सामना कमालीचा अटीतटीचा ठरला. पावसाच्या व्यत्ययामुळे प्रत्येकी ५ षटकांच्या करण्यात आलेल्या या सामन्यात भारतीय संघाने जपानवर अवघ्या २ धावांनी निसटता विजय मिळवला.
टॉस जिंकून प्रथम फलंदाजी करताना भारताने ५ षटकांत ४ बाद ३२ धावा उभारल्या. यात कर्णधार श्रेयस अय्यरने १६, संजू सॅमसनने ९ आणि इशान किशनने ३ धावांचे योगदान दिले. प्रत्युत्तरात ३३ धावांच्या आव्हानाचा पाठलाग करताना जपानचा संघ ५ षटकांत ३ बाद ३० धावांपर्यंतच मजल मारू शकला. अखेरच्या षटकात जपानला विजयासाठी ८ धावांची आवश्यकता असताना, अक्षर पटेलने उत्कृष्ट गोलंदाजीचे प्रदर्शन करत केवळ ५ धावा दिल्या आणि भारताच्या विजयावर शिक्कामोर्तब केले. भारत आणि जपान यांच्यात खेळवला गेलेला हा पहिलाच आंतरराष्ट्रीय क्रिकेट सामना होता.
