AB de Villiers RCB IPL 2026: आयपीएल 2026 च्या अंतिम सामन्यात गुजरात टायटन्सवर 5 विकेट्सने मात करत रॉयल चॅलेंजर्स बंगळुरूने (RCB) सलग दुसऱ्यांदा विजेतेपद पटकावले. या ऐतिहासिक विजयासह आरसीबीने पुन्हा एकदा क्रिकेटविश्वाचे लक्ष वेधून घेतले असून सोशल मीडियावर चाहत्यांनी आणि क्रिकेट दिग्गजांनी अभिनंदनाचा वर्षाव केला आहे.
अहमदाबादच्या नरेंद्र मोदी स्टेडियमवर झालेल्या अंतिम सामन्यात आरसीबीच्या गोलंदाजांनी सुरुवातीपासूनच गुजरातवर दबाव निर्माण केला. जोश हेझलवूड आणि भुवनेश्वर कुमार यांनी अनुक्रमे शुभमन गिल आणि साई सुदर्शन यांना लवकर बाद करत गुजरातला मोठे धक्के दिले. त्यानंतर रसिख सलाम धरने मधल्या फळीतील महत्त्वाच्या विकेट्स घेत गुजरातचा डाव विस्कळीत केला.
वॉशिंग्टन सुंदरने नाबाद अर्धशतक झळकावत झुंज दिली, मात्र गुजरातला 20 षटकांत 155 धावांपर्यंतच मजल मारता आली.
156 धावांच्या लक्ष्याचा पाठलाग करताना विराट कोहली आणि वेंकटेश अय्यर यांनी तुफानी सुरुवात केली. विशेषतः कागिसो रबाडाच्या गोलंदाजीवर दोघांनी जोरदार फटकेबाजी करत अवघ्या पाच षटकांत 62 धावांची भागीदारी उभारली आणि आरसीबीचा विजय जवळपास निश्चित केला.
आरसीबीचा माजी स्टार फलंदाज आणि चाहत्यांचा लाडका खेळाडू एबी डिव्हिलियर्सने आरसीबीच्या विजयानंतर सोशल मीडियावर "Ee Saala… 2x Naamdu #RCB" अशी पोस्ट केली. त्याची ही प्रतिक्रिया काही क्षणांतच व्हायरल झाली आणि आरसीबी चाहत्यांनी ती मोठ्या प्रमाणावर शेअर केली.
सचिन तेंडुलकरने आरसीबीच्या सलग दोन विजेतेपदांबद्दल अभिनंदन करत म्हटले की, "एकदा विजेतेपद जिंकणे महत्त्वाचे असते, पण ते टिकवून ठेवणे त्याहून मोठे आव्हान असते. आरसीबीने यंदा ते उत्कृष्टपणे सिद्ध केले."
आरसीबीचे माजी मालक विजय मल्ल्यानेही संघाचे अभिनंदन करत, "RCB RCB... सलग दोन आयपीएल विजेतेपदे! आमच्या सिंहांनी पुन्हा गर्जना केली," अशी प्रतिक्रिया दिली.
अंतिम सामन्यात विराट कोहलीने पुन्हा एकदा मोठी खेळी करत संघाला विजयाच्या उंबरठ्यावर नेले. त्याच्या आक्रमक फलंदाजीमुळे आरसीबीने लक्ष्य सहज गाठले आणि सलग दुसरे विजेतेपद आपल्या नावावर केले.
आरसीबीच्या या ऐतिहासिक यशानंतर सोशल मीडियावर #RCB, #ViratKohli आणि #EeSaalaCupNamdu हे हॅशटॅग ट्रेंड होत असून क्रिकेट चाहत्यांमध्ये जल्लोषाचे वातावरण आहे.
