Ramayana Trailer Launch Postponed
'रामायण'च्या निर्मात्यांनी 'सोनी पिक्चर्स एंटरटेनमेंट'सोबत जागतिक प्रदर्शनासाठी भागीदारी केल्यानंतर चित्रपटाचा ट्रेलर लाँच पुढे ढकलला आहे. नमित मल्होत्रा यांनी सांगितले की, हा विलंब एका जागतिक रणनीतीचा भाग आहे आणि त्यांनी याला भारतीय चित्रपटसृष्टीसाठी एक ऐतिहासिक क्षण म्हटले आहे.
रणबीर कपूर आणि यश यांच्या प्रमुख भूमिका असलेल्या बहुचर्चित 'रामायण' चित्रपटाचा ट्रेलर 24 जुलै रोजी रिलीज होणार होता. मात्र, आता निर्मात्यांनी त्याचे लाँच पुढे ढकलण्याचा निर्णय घेतला आहे. चित्रपटाच्या जागतिक प्रदर्शनाच्या नियोजनामुळे हा निर्णय घेण्यात आल्याची माहिती निर्माता नमित मल्होत्रा यांनी सोशल मीडियावर दिली.
नमित मल्होत्रा यांनी सांगितले की, भागीदारीमुळे 'रामायण' आता जगभरातील प्रेक्षकांपर्यंत पोहोचणार आहे. अनेक वर्षांपासून हे स्वप्न पाहत होतो आणि आता ते प्रत्यक्षात येत असल्याचे त्यांनी म्हटले.
ट्रेलर रिलीज होणाऱ्या उशीराबाबत बोलताना ते म्हणाले की, चित्रपटाचा ट्रेलर आता जागतिक स्तरावरील विशेष लाँच मोहिमेचा भाग म्हणून नव्या तारखेला रिलीज केला जाईल. भारतीय चित्रपटसृष्टीसाठी हा अभिमानाचा क्षण ठरेल आणि 'रामायण'ला मोठ्या हॉलिवूड चित्रपटांप्रमाणे आंतरराष्ट्रीय स्तरावर सादर केले जाईल.
भारतीय संस्कृती आणि पौराणिक कथा जगभरातील प्रेक्षकांपर्यंत पोहोचवण्याची ही मोठी संधी असल्याचे नमूद करत त्यांनी चाहत्यांचे आभार मानले. तसेच देशातील तरुण पिढीने आपल्या सांस्कृतिक वारशाचा अभिमान बाळगावा, असे आवाहनही त्यांनी केले.
नितेश तिवारी दिग्दर्शित या भव्य चित्रपटात रणबीर कपूर प्रभू राम, साई पल्लवी सीता आणि यश रावणाच्या भूमिकेत दिसणार आहेत. यापूर्वी 18 जुलै रोजी दिल्लीमध्ये चित्रपटाचा कार्यक्रम आयोजित करण्यात आला होता. यावेळी कलाकारांची ओळख चाहत्यांना करून देण्यात आली. त्यानंतर 20 जुलै रोजी कॉमिक-कॉन सॅन दिएगो 2026मध्येही 'रामायण'ची विशेष झलक सादर करण्यात आली.
