Pach Futacha Bachchan First Look: मराठी चित्रपटसृष्टीत वेगवेगळ्या विषयांवर प्रयोग करणाऱ्या चित्रपटांची संख्या वाढत असताना आता आणखी एका आगळ्यावेगळ्या कथेने प्रेक्षकांचं लक्ष वेधून घेतलं आहे. दिग्दर्शक कौस्तुभ रमेश देशपांडे यांच्या बहुप्रतिक्षित ‘पाच फुटाचा बच्चन’ या आगामी मराठी चित्रपटाचा फर्स्ट लूक नुकताच प्रदर्शित झाला आहे. चित्रपटाच्या शीर्षकामुळे आधीच उत्सुकता निर्माण झाली होती आणि आता फर्स्ट लूक समोर आल्यानंतर या चित्रपटाबद्दलची चर्चा आणखी वाढली आहे.
‘पाच फुटाचा बच्चन’ ही केवळ एका व्यक्तीच्या यशाची गोष्ट नाही, तर स्वप्न, संघर्ष, ओळख आणि स्वतःच्या मूल्यांशी प्रामाणिक राहण्याच्या प्रवासाची कहाणी आहे. कीर्तनकार कुटुंबातून आलेल्या एका तरुणीच्या आयुष्याभोवती या चित्रपटाची कथा फिरते. लहान उंची असलेल्या या मुलीने कीर्तनाच्या विश्वात स्वतःची वेगळी ओळख निर्माण केली आहे. गावातून आलेली ही तरुणी आज अध्यात्मिक क्षेत्रातील लोकप्रिय चेहरा आहे. मात्र, यशाच्या उंचीवर पोहोचताना तिच्या आयुष्यात निर्माण होणारे संघर्ष आणि पेच या चित्रपटात आहेत.
या चित्रपटात श्रुती मधुदीप मुख्य भूमिकेत दिसणार आहे. त्यांच्या भूमिकेकडे विशेष लक्ष असणार आहे, कारण संपूर्ण कथानकातील संघर्ष आणि प्रवास त्यांच्या व्यक्तिरेखेभोवती उलगडत जाणार आहे. त्यांच्यासोबत गौरी नलावडे, शशांक शेंडे आणि किशोर कदम यांसारखे अनुभवी आणि लोकप्रिय कलाकारही महत्त्वाच्या भूमिकांमध्ये दिसणार आहेत.
कीर्तन परंपरेची पार्श्वभूमी हा या चित्रपटाचा आणखी एक महत्त्वाचा भाग आहे. महाराष्ट्राच्या सांस्कृतिक आणि अध्यात्मिक जीवनात कीर्तनाला विशेष स्थान आहे. मात्र, या पारंपरिक विश्वातून एका आधुनिक काळातील संघर्षाची कथा सांगण्याचा प्रयत्न ‘पाच फुटाचा बच्चन’मध्ये करण्यात आला आहे. त्यामुळे परंपरा आणि आजच्या वास्तवातील संघर्ष यांचा वेगळा संगम या चित्रपटात पाहायला मिळू शकतो. फर्स्ट लूकमुळे चित्रपटाचा नेमका अंदाज बांधणे कठीण असले तरी त्यातील व्यक्तिरेखा आणि कथानकाची झलक प्रेक्षकांची उत्सुकता वाढवणारी आहे.
दरम्यान, ‘पाच फुटाचा बच्चन’ हा चित्रपट 9 ऑक्टोबर 2026 रोजी प्रेक्षकांच्या भेटीला येणार आहे. वेगळं शीर्षक, कीर्तनविश्वाची पार्श्वभूमी, एका तरुणीचा संघर्षमय प्रवास आणि दमदार कलाकारांची फौज यामुळे या चित्रपटाबद्दलची उत्सुकता आतापासूनच वाढू लागली आहे. आता फर्स्ट लूकनंतर चित्रपटाचा ट्रेलर कधी येणार आणि या कथेबद्दल आणखी कोणते पैलू समोर येणार, याकडे चित्रपटप्रेमींचं लक्ष लागलं आहे.
