पुढारी ऑनलाईन : आंतराष्ट्रीय पातळीवर युद्धनीतीचे आदर्श मानले जाणारे महाराष्ट्राचं आराध्य दैवत छत्रपती शिवाजी महाराजांच्या सुवर्ण इतिहासातील आणखी एक सोनेरी अध्याय मोठ्या पडद्यावर उलघडणार आहे. लेखक-अभिनेता-दिग्दर्शक दिग्पाल लांजेकरच्या संकल्पनेतून उदयास आलेल्या शिवराज अष्टकातील 'पावनखिंड' हा तिसऱ्या चित्रपट आहे. यामध्ये पुन्हा एकदा छत्रपती शिवाजी महाराजांची भूमिका अभिनेता चिन्मय मांडलेकर साकारणार आहे.
'फर्जंद' आणि 'फत्तेशिकस्त' या दोन चित्रपटांच्या अभूतपूर्व यशानंतर 'पावनखिंड' मध्ये पुन्हा एकदा छत्रपती शिवाजी महाराजांची भूमिका अभिनेता चिन्मय मांडलेकर साकारणार आहे. ए. ए. फिल्म्स प्रस्तुत आणि आलमंड्स क्रिएशन्स निर्मित 'पावनखिंड' चित्रपट २१ जानेवारी २०२२ रोजी प्रदर्शित होणार आहे. अजय आरेकर, अनिरुद्ध आरेकर आणि भाऊसाहेब आरेकर यांनी या चित्रपटाची निर्मिती केली आहे. आजवर दिग्पाल यांनी लिहिलेल्या आणि दिग्दर्शित केलेल्या दोन्ही चित्रपटांमध्ये महाराजांची दोन भिन्न रूपं पाहायला मिळाली आहेत. आता 'पावनखिंड' मध्ये पुन्हा महाराजांची तळपती तलवार पाहायला मिळणार आहे. चित्रपटाच्या पोस्टरवर चिन्मयचं आजवर कधीही न दिसलेलं करारी रूप पाहायला मिळत आहे.
धो धो कोसळणाऱ्या पावसात नेमकं काय घडलं?, शिवरायांच्या मागावर असणाऱ्या शत्रूचा कसा पराभव झाला? पोस्टरवर दिसणारे शिवराय नेमके कोणाशी दोन हात करत आहेत? या आणि अशा बऱ्याच इतिहासकालीन प्रश्नांची उत्तरं 'पावनखिंड' चित्रपटात मिळणार आहेत.
तिसऱ्यांदा रुपेरी पडद्यावर छत्रपती शिवाजी महाराजांची भूमिका साकारण्याची संधी चिन्मयला मिळाली आहे. याबाबत बोलताना त्याने सांगितले की, पूर्व संचिताशिवाय छत्रपती शिवाजी महाराजांची व्यक्तिरेखा वाट्याला येणं शक्य नाही. लागोपाठ तीन चित्रपटांमध्ये महाराजांची भूमिका साकारायला मिळणं हे मी माझं भाग्यच मानतो. 'पावनखिंड' मध्ये बाजीप्रभू देशपांडे आणि बांदल सेनेने स्वराज्य आणि महाराजांच्या रक्षणाकरीता दिलेल्या अमूल्य बलिदानाची सुवर्णगाथा पाहायला मिळणार आहे.
हेही वाचलंत का?
