पुढारी ऑनलाईन डेस्क : आलिया भट्ट प्रत्येक चित्रपटात तिचे 100 टक्के योगदान देते. तिच्या अभिनयातून त्याची पोचपावती मिळत असते. आताही एक वेगळ्या विषयातून आलिया प्रेक्षकांच्या भेटीला येत आहे. शेफाली शाह आणि आलिया यांची प्रमुख भूमिका असलेल्या 'डार्लिंग्ज' चा ट्रेलर रीलिज झाला आहे. हा चित्रपट नेटफ्लिक्सवर रीलिज होणार असून हा एक डार्क कॉमेडी चित्रपट आहे. यात विजय शर्मा देखील मुख्य भूमिकेत आहे.
पतीच्या अत्याचाराविरोधात लढण्यासाठी आलिया तिच्या स्वतःच्याच पतीचे अपहरण करते, अशी या चित्रपटाची कहाणी आहे. चित्रपटात आलिया आणि शेफाली यांचा अत्यंत वेगळा अंदाज दिसून येतो. हा चित्रपट 5 ऑगस्टला नेटफ्लिक्सवर येत आहे. आगामी काळात आलिया 'ब्रह्मास्त्र', 'रॉकी और राणी की प्रेमकहानी'सह हॉलीवूडच्या 'हार्ट ऑफ स्टोन'मध्ये दिसणार आहे. दरम्यान, आलिया सध्या गर्भवती आहे. गेल्या महिन्यात तिने तिची प्रेग्नन्सी घोषित केली होती.
'डार्लिंग्ज' चित्रपटाचा ट्रेलर रिलीज झाला आहे. ट्रेलर पाहिल्यानंतर या चित्रपटाची कथा खूपच रंजक वाटते. या चित्रपटात विजय वर्मा आलियाच्या पतीची भूमिका साकारताना दिसणार आहे. चित्रपटाची कथा आलिया, विजय आणि शेफाली यांच्याभोवती फिरताना दिसणार आहे. प्रेमकथा आणि ग्लॅमरपासून दूर दिसणाऱ्या या चित्रपटाच्या ट्रेलरमध्ये 'डार्लिंग्ज' ची खासियत दिसून येते. इतकंच नाही तर 'डार्लिंग्ज' चित्रपटातील शेफाली शाहची व्यक्तिरेखाही खूप मजेशीर असणार आहे.
या चित्रपटापूर्वी आलिया अशा स्टाईलमध्ये दिसली नाही. चित्रपटाचा ट्रेलर शेअर करताना त्याने कॅप्शनमध्ये लिहिले की, "निर्माता म्हणून हा माझा पहिलाच चित्रपट आहे. हा चित्रपट तुमच्यासोबत शेअर करताना खूप उत्साही, चिंताग्रस्त, रोमांचित आणि भावूक वाटत आहे."
