शिवाजी शिंदे
पुणे : पुणे आणि पिंपरी-चिंचवड शहरातील वाहतूक कोंडी सोडविण्यासाठी 172 किलोमीटर आणि 110 मीटर वर्तुळाकार रस्त्याचा प्रकल्प महाराष्ट्र राज्य रस्ते विकास महामंडळाने (MSRDC) हाती घेतला आहे. या रस्त्याच्या प्रकल्पासाठी पश्चिम मार्गाचे फेरमूल्यांकन पूर्ण झाले आहे. त्यानंतर रस्त्याच्या पश्चिम भागातील मार्गाची दरनिश्चिती करण्यात आली. त्यामुळे पुढील काही दिवसांत पश्चिम भागातून जाणार्या रस्त्याचा शेतकर्यांना मोबदला दिला जाणार आहे.
तसेच जमीन ताब्यात घेण्याबाबत नोटीस देण्यात येणार आहे. दरम्यान, जूनअखेरपासून प्रकल्पग्रस्तांची किती जमीन संपादित केली जाणार आहे, त्याचा मोबदला किती मिळेल, याबाबतची नोटीस पाठविण्यात येईल, अशी माहिती रस्ते विकास महामंडळाच्या अधिकार्यांनी दिली. या रस्त्याच्या पूर्ण कामासाठी 26 हजार 800 कोटी खर्च अपेक्षित असून, तो 2026 पर्यंत पूर्ण करण्याचे नियोजन आहे.
या प्रकल्पाचे पूर्व आणि पश्चिम, असे दोन भाग केले आहेत. पूर्व मार्ग मावळातील 11, खेडमधील 12, हवेलीतील 15, पुरंदरमधील 5 आणि भोरमधील 3 गावांतून प्रस्तावित आहे; तर पश्चिम मार्ग भोरमधील 5, हवेलीतील 11, मुळशीतील 15 आणि मावळमधील 6 गावांतून जाणार आहे. संपूर्ण प्रकल्पासाठी 26 हजार 800 कोटींचा खर्च अपेक्षित आहे. या प्रकल्पासाठी मूल्यांकन प्रक्रिया राबविण्यात आली.
मात्र, जमिनींचे मूल्यांकन गेल्या तीन वर्षांतील खरेदी-विक्रीचे व्यवहार गृहीत धरून करण्यात आले. कोरोना काळात ज्या भागातून रिंगरोड जात आहे, त्या भागातील बहुतांश गावांत खरेदी-विक्रीचे व्यवहार अत्यल्प झाले. परिणामी, प्रकल्पासाठी घेण्यात येणार्या जमिनींचा दर कमी होत असल्याचा आक्षेप काही गावांतील स्थानिकांनी घेतला. त्यामुळे पाच वर्षांतील खरेदी-विक्री व्यवहारांचे मूल्यांकन करण्याचा निर्णय घेण्यात आला. त्यानुसार पश्चिम भागातील बहुतांश सर्वच गावांचे फेरमूल्यांकन पूर्ण केले आहे. पूर्व भागातील काही गावांचे फेरमूल्यांकन अद्याप बाकी आहे. हे फेरमूल्यांकन लवकर पूर्ण होईल.
हेही वाचा
