पिंपरी: शिक्षणाच्या प्रवाहापासून दूर असलेल्या बालकांचा शोध घेऊन त्यांना पुन्हा शाळेत आणण्यासाठी पिंपरी-चिंचवड महापालिकेच्या शिक्षकांनी केलेल्या सर्वेक्षणात १२४ शाळाबाह्य बालके आढळली आहेत. त्यापैकी ११७ बालकांना शाळेत दाखल केले असून, उर्वरित सात बालकांची शाळाबाह्य म्हणून नोंद केली आहे. १५ ते ३० जुलै २०२६ दरम्यान महापालिकेच्या ११० शाळांच्या परिसरात झालेल्या या सर्वेक्षणातून या बालकांच्या शैक्षणिक स्थितीची माहिती संकलित करण्यात आली.
महापालिकेने ३ ते १८ वर्षे वयोगटातील चार लाख एक हजार ३०६ बालकांची माहिती संकलित केली असून, त्यात दोन लाख नऊ हजार ७३९ मुले आणि एक लाख ९१ हजार ५६७ मुलींचा समावेश आहे. यापैकी चार लाख एक हजार १८२ बालकांची अंगणवाडी किंवा शाळेत नोंद असल्याचे आढळले.
शाळाबाह्य आढळलेल्या १२४ बालकांमध्ये ६१ मुले आणि ६३ मुली आहेत. यातील ११७ बालके शाळेत कधीही दाखल न झालेली अथवा सर्वेक्षणाच्या निकषांनुसार शाळाबाह्य असल्याचे आढळले. सात बालकांची दीर्घकाळ अनियमित उपस्थिती असल्याचे नोंदविण्यात आले. विशेष गरजाधिष्ठित तसेच बालकामगारांची नोंद झाली नसल्याचे सर्वेक्षणात नमूद आहे.
शहरातून बाहेर गेलेल्या १२५ बालकांची नोंद
रोजगार, व्यवसाय आणि अन्य कारणांमुळे कुटुंबांचे स्थलांतर होत असल्याने अशा बालकांचीही स्वतंत्र नोंद करण्यात आली. पिंपरी-चिंचवडमधून अन्यत्र गेलेल्या १२५ बालकांमध्ये ४९ बालके जिल्ह्याच्या अंतर्गत, ७० अन्य जिल्ह्यांत आणि सहा परराज्यात स्थलांतरित झाल्याचे आढळले. यापैकी ११७ बालकांना शिक्षण हक्काचे पत्र देण्यात आले.
बाहेरून आलेली २२७ बालके शाळेत
अन्य भागांतून पिंपरी-चिंचवडमध्ये आलेल्या २२७ बालकांची नोंद झाली आहे. त्यात शहरातून ३९, अन्य जिल्ह्यांतून १३४ आणि परराज्यातून आलेल्या ५४ बालकांचा समावेश आहे. या सर्व २२७ बालकांना शाळेत दाखल केल्याची नोंद आहे.
