पिंपरी: पिंपरी-चिंचवड पोलिस आयुक्तालयात प्रशासकीय फेरबदल करण्यात आले आहेत. बदलीवर नव्याने हजर झालेल्या १० पोलिस निरीक्षकांना विविध ठिकाणी नियुक्त्या देण्यात आल्या आहेत. गुन्हे शाखा, वाहतूक शाखा आणि विशेष शाखेसह महत्त्वाच्या पोलिस ठाण्यांची जबाबदारी अधिकाऱ्यांकडे सोपविण्यात आली आहे.
नव्या नियुक्त्यांमुळे शहरातील गुन्हेगारीला आळा घालणे, वाहतूक व्यवस्था सुधारणे आणि कायदा-सुव्यवस्था अधिक सक्षम करण्यावर भर राहणार आहे. संबंधित अधिकाऱ्यांना तत्काळ पदभार स्वीकारण्याचे आदेश देण्यात आले आहेत.
शहराचा वाढता विस्तार आणि त्यासोबत निर्माण होणारी गुन्हेगारी, वाहतूक आणि कायदा-सुव्यवस्थेची आव्हाने पाहता या नियुक्त्यांना महत्त्व प्राप्त झाले आहे. नव्या अधिकाऱ्यांच्या अनुभवाचा प्रशासनाला फायदा होण्याची अपेक्षा आहे. त्यामुळे आगामी काळात गुन्हेगारीविरोधातील कारवाई आणि वाहतूक नियमनाला अधिक वेग येण्याची शक्यता आहे.
नियुक्त झालेले अधिकारी
अमोल चंद्रकांत गवळी (गुन्हे शाखा), देवेंद्र परशराम चव्हाण (पोलिस आयुक्तांचे वाचक), हेमंत पोपटराव कदम (विशेष शाखा), राजेन्द्र जयवंत निकाळजे (वाहतूक शाखा), सिद्धराम महादेव म्हेत्रे (हिंजवडी पोलिस ठाणे), गीताराम लक्ष्मण शेवाळे (नियंत्रण कक्ष), विजयकुमार गोरख शिंदे (पिंपरी पोलिस ठाणे), प्रशांत ज्ञानोबा आरदवाड (चाकण उत्तर पोलिस ठाणे), सुरेखा शरद घार्गे (गुन्हे शाखा), चंद्रकांत विनायक जाधव (निगडी पोलिस ठाणे).
