पिंपळे गुरव: येथील नटसम्राट निळू फुले नाट्यगृहातील अग्निसुरक्षा व्यवस्थेतील त्रुटींबाबत दैनिक पुढारीने प्रकाशित केलेल्या वृत्ताची प्रशासनाने गंभीर दखल घेत तातडीने कार्यवाही केली आहे. नाट्यगृहातील सर्व अग्निशामक सिलिंडरची तपासणी करुन त्यांचे रिफिलिंग आणि नूतनीकरण पूर्ण करण्यात आले असून, सुरक्षाव्यवस्था अधिक सक्षम करण्यात आली आहे.
नाट्यगृहामध्ये प्रवेशद्वार आपत्कालीन मार्ग, स्टेज परिसर, बॅकस्टेज मेकअप रूम साऊंड व लाईट विभाग, इलेक्ट्रिकल पॅनल रूम तसेच प्रेक्षक हॉलमध्ये बसविण्यात आलेल्या सीओटू, एबीसी प्रकारच्या अग्निशामक सिलिंडर्स आणि फायर बॉलची तपासणी करण्यात आली.
त्यानंतर सर्व उपकरणे अद्ययावत करून त्यांना नव्याने वैधता देण्यात आली आहे. दररोज विविध सांस्कृतिक सामाजिक व शैक्षणिक कार्यक्रमांसाठी मोठ्या प्रमाणावर नागरिक नाट्यगृहात येत असल्याने अग्निसुरक्षेचा मुद्दा अत्यंत महत्त्वाचा मानला जातो.
या पार्श्वभूमीवर झालेल्या तातडीच्या कार्यवाहीमुळे नागरिकांनी समाधान व्यक्त केले आहे. यापुढेही नाट्यगृहातील अग्निसुरक्षा व्यवस्थेची नियमित तपासणी, फायर सेफ्टी ऑडिट आणि आवश्यक देखभाल वेळोवेळी करण्यात यावी, अशी अपेक्षा नागरिकांनी व्यक्त केली आहे.
नागरिकांच्या सुरक्षेशी संबंधित महत्त्वाचा प्रश्न प्रभावीपणे मांडून प्रशासनाचे लक्ष वेधल्याबद्दल स्थानिक नागरिकांनी आणि सांस्कृतिक क्षेत्रातील रसिकांनी दैनिक पुढारीचे आभार व्यक्त केले आहेत.
