लोणावळा: आखाड पार्ट्या करण्यासाठी लोणावळा शहरात पर्यटकांची मोठी गर्दी झाली आहे. पर्यटकांच्या या गर्दीमुळे शहरातील सर्व पर्यटनस्थळे गजबजली असून, हॉटेल, फार्महाऊस व खासगी बंगले पर्यटकांनी भरले आहेत.
पुढील आठवड्यामध्ये श्रावण महिना सुरू होणार आहे. हा महिना सुरू होण्यापूर्वी आखाड पार्ट्या सर्वत्र जोरात चालतात. पर्यटनस्थळ असलेल्या लोणावळा शहर व आजूबाजूच्या ग्रामीण भागात मोठ्या प्रमाणात मुंबई, पुणे, पिंपरी-चिंचवड व अन्य भागांमधून पर्यटक दाखल झाले आहेत. अनेक तरुण-तरुणींचे ग्रुप खासगी बंगल्यांमध्ये मुक्कामी आहेत.
या ठिकाणी मोठ्या प्रमाणात आखाड पार्ट्या रंगल्या असल्याचे चित्र पाहायला मिळत आहे. लोणावळा शहरामध्ये दीडशेहून अधिक लहान-मोठी हॉटेल्स आहेत. तर, हजारो बंगले आहेत. बंगल्यांमध्ये फार नियमांचे पालन करावे लागत नसल्यामुळे पर्यटक हॉटेलमध्ये राहण्याऐवजी खासगी बंगल्यांना प्राधान्य देत आहेत. या ठिकाणी स्विमिंग पूलमध्ये भिजण्याचा आनंद घेत पार्ट्या रंगत आहेत.
पर्यटनस्थळांवर सुरक्षिततेसाठी पोलिस बंदोबस्त तैनात
शहरातील वाहतूक कोंडी नियंत्रणात ठेवण्यासाठी व पर्यटनस्थळांवर सुरक्षिततेसाठी पुणे ग्रामीण पोलिसांकडून पोलिस बंदोबस्त तैनात करण्यात आला आहे. लोणावळा शहर पोलिस तसेच ग्रामीणचे पोलिस कर्मचारी हेदेखील वाहतूक नियंत्रण व पर्यटनस्थळांवर कायदा व सुव्यवस्थेसाठी तैनात आहेत. मात्र, पर्यटकांची व पर्यटकांच्या वाहनांची संख्या मोठी असल्यामुळे वाहतूक नियोजन कोलमंडले आहे. पर्यटनस्थळांवर कोणताही अनुचित प्रकार घडू नये, याकरिता पोलिस तैनात आहेत. काही पोलिस मित्रदेखील पोलिसांना या कामी मदत करत आहेत.
ठिकठिकाणी वाहतूक कोंडी
मागील दोन-तीन दिवसांपासून शहरामध्ये पावसाचा जोर कमी झाला आहे. त्यामुळे हिरव्यागार निसर्गाचा आनंद घेत पर्यटनस्थळांवर व डोंगर भागामध्ये पर्यटक फिरताना दिसत आहेत. सहारा पुन्हा समोरील धबधबे, भूशी धरण, टायगर पॉईंट, शिवलिंग पॉईंट, खंडाळा राजमाची पॉईंट, ड्युक्स नोज पॉइंट, मिसिंग लिंक पॉईंट, तुंगार्ली धरण, भाजे लेणी व धबधबा, कार्ला लेणी हा परिसर पर्यटकांनी गजबजला आहे. पर्यटकांच्या या गर्दीमुळे शहरामध्ये मोठ्या प्रमाणात वाहतूक कोंडी झाली असून, नागरिकांना या कोंडीचा मनस्ताप सहन करावा लागतो आहे. पर्यटकांनादेखील पर्यटनस्थळासाठी काही तास वाहतूक कोंडीतून जावे लागत आहे.
