पिंपरी: फुगेवाडी येथील विषारी दारू पिऊन मृत झालेल्या व्यक्तीच्या नातेवाईकांना मुख्यमंत्री सहायता निधीतून पाच लाखांची मदत केली जाणार आहे, असे राज्याचे आपत्ती व्यवस्थापनमंत्री गिरीश महाजन यांनी शनिवारी (दि. 30) सांगितले. या प्रकरणात अतिउच्च अधिकारी दोषी असल्यास त्यांनाही सोडले जाणार नाही, असा इशाराही त्यांनी दिला आहे.
मंत्री गिरीश महाजन यांनी आज फुगेवाडी भागास भेट दिली. मृतांच्या कुटुंबीय, नातेवाईकांनाची भेट घेऊन त्यांचे सात्वंन केले. त्यांना धीर दिला. या वेळी आमदार शंकर जगताप, आमदार अमित गोरखे, महापौर रवी लांडगे, सत्तारुढ पक्षनेते प्रशांत शितोळे, माजी खासदार अमर साबळे आदी उपस्थित होते.
माध्यमाशी बोलताना मंत्री महाजन म्हणाले, मिथेनॉलचे मिश्रण करून विषारी दारूची विक्री केली जात होती. ती दारू पिल्याने 19 जणांचा मृत्यू झाला आहे. मृत्यू झालेल्या कुटुंबातील व्यक्तीच्या नातेवाईकांना मुख्यमंत्री सहायता निधीतून पाच लाखांची मदत केली जाणार आहे.
रोजीरोटीसाठी त्यांना पिंपरी-चिंचवड महापालिकेत कंत्राटी पद्धतीने सामावून घेतले जाणार आहे. राज्य उत्पादन शुल्क विभागाने 13 जणांना निलंबित केले आहे. दारू विक्रीकडे पोलिसांचे दुर्लक्ष झाले आहे.
मुख्यमंत्री देवेंद्र फडणवीस यांनी पोलिसांना कडक शब्दात सूचना दिल्या आहेत. यापुढे एक थेंबही दारूची विक्री होणार नाही. यातील एकही दोषी सुटणार नाही, असे महाजन यांनी सांगितले.
