Vadodara MS University student saree dhak dhak dance Viral Video
वडोदरा: गुजरातच्या वडोदरा येथील महाराजा सयाजीराव (एमएसयू) विद्यापीठात अखिल भारतीय विद्यार्थी परिषदेने 'संस्कार-संगम' हा सांस्कृतिक महोत्सव आयोजित केला होता. यामध्ये एका विद्यार्थिनीने 'धक धक करने लगा' या बॉलिवूड गाण्यावर नृत्य सादर केले होते. यावरून आता एका नव्या वादाला तोंड फुटले आहे.
महाराजा सयाजीराव विद्यापीठात 'संस्कार संगम' या तीन दिवसीय सांस्कृतिक महोत्सवाचे आयोजन करण्यात आले होते. या कार्यक्रमात एका विद्यार्थिनीने भगवी साडी नेसून बॉलिवूडमधील प्रसिद्ध गाणे "धक-धक करने लगा"वर नृत्य सादर केले. या नृत्याचा व्हिडिओ व्हायरल झाल्यानंतर काँग्रेसची विद्यार्थी संघटना 'एनएसयूआय'ने यावर तीव्र आक्षेप घेतला आहे.
एनएसयूआयने या सादरीकरणाला 'अभद्र' आणि 'अश्लील' म्हटले आहे. सांस्कृतिक कार्यक्रमाच्या नावाखाली अशा प्रकारची सादरीकरणे विद्यापीठाच्या 'संस्कारां'ना काळिमा फासणारी असल्याचे त्यांनी म्हटले आहे. अशा आयोजनांमुळे सांस्कृतिक कार्यक्रमांच्या प्रतिष्ठेला धक्का बसत असल्याची टीकाही संघटनेने केली. "एमएस युनिव्हर्सिटी हे विद्येचे मंदिर आहे, मनोरंजनाचे किंवा अश्लीलतेचे व्यासपीठ नाही," असे एनएसयूआयचे अध्यक्ष अमर वाघेला यांनी स्पष्ट केले.
या संपूर्ण प्रकरणावर संबंधित विद्यार्थिनीने एका व्हिडिओद्वारे आपली प्रतिक्रिया दिली आहे. व्हिडिओमध्ये ती अत्यंत भावूक झाल्याचे दिसत आहे. ती म्हणाली, "मी अभाविपला ओळखत नाही की एनएसयूआयला. मी साडी नेसून डान्स केला होता, त्यात अश्लीलता कुठे होती? कदाचित 'धक-धक' गाण्यावर डान्स करणे ही माझी चूक असावी, पण त्यावर अश्लीलतेचे आरोप होणे चुकीचे आहे."
या प्रकरणावरून आता विद्यापीठ प्रशासनावर कारवाईसाठी दबाव वाढत आहे. एनएसयूआयने या प्रकरणात सहभागी असलेल्यांवर निलंबनाची कारवाई करण्याची मागणी केली आहे. जर विद्यापीठ प्रशासनाने तातडीने कठोर पावले उचलली नाहीत, तर तीव्र आंदोलनाचा इशाराही संघटनेने दिला आहे. या वादामुळे सध्या विद्यापीठ परिसरात तणावाचे आणि राजकीय वातावरण तापलेले पाहायला मिळत आहे.
