Sonam Wangchuk Hunger Strike: शिक्षणतज्ज्ञ आणि पर्यावरण कार्यकर्ते सोनम वांगचुक गेल्या 17 दिवसांपासून दिल्लीतील जंतर-मंतर येथे आमरण उपोषण करत आहेत. त्यांची प्रकृती दिवसेंदिवस खालावत असून, याबाबत आंदोलनकर्त्यांनी गंभीर चिंता व्यक्त केली आहे.
प्रसिद्ध करण्यात आलेल्या वैद्यकीय अहवालानुसार, उपोषण सुरू झाल्यापासून सोनम वांगचुक यांचे सुमारे 8.25 किलो वजन घटले आहे. तसेच त्यांच्या रक्तातील साखरेची पातळी अनेक वेळा 70 mg/dL पेक्षाही खाली गेल्याचे सांगण्यात आले आहे.
याशिवाय त्यांना सतत चक्कर येणे, स्नायूंची झपाट्याने झीज होणे आणि शरीरात अशक्तपणा जाणवत असल्याचेही अहवालात नमूद करण्यात आले आहे. प्रकृती खालावली असली तरी वांगचुक यांनी आपल्या भूमिकेवर ठाम असल्याचे स्पष्ट केले. पत्रकारांशी बोलताना ते म्हणाले, "मी बाहेरून कमकुवत दिसत असलो तरी आतून अजूनही मजबूत आहे."
जंतर-मंतर येथे सुरू असलेल्या या आंदोलनाचे नेतृत्व 'कॉकरोच जनता पार्टी' (Cockroach Janta Party - CJP) या चळवळीने केले आहे. संस्थापक अभिजीत दिपके यांच्या नेतृत्वाखाली सुरू असलेल्या या आंदोलनात देशातील शिक्षण व्यवस्थेत सुधारणा करण्याची मागणी करण्यात येत आहे.
आंदोलनकर्त्यांची प्रमुख मागणी म्हणजे NEET प्रश्नपत्रिका फुटीच्या प्रकरणाची नैतिक जबाबदारी स्वीकारून केंद्रीय शिक्षणमंत्री धर्मेंद्र प्रधान यांनी राजीनामा द्यावा. आंदोलनकर्त्यांचे म्हणणे आहे की, या प्रकरणात जबाबदारी निश्चित होणे आवश्यक आहे.
मात्र, केंद्रीय शिक्षणमंत्री धर्मेंद्र प्रधान यांनी राजीनामा देण्यास नकार दिला आहे. एका मुलाखतीत त्यांनी या आंदोलनावर टीका करत आंदोलनकर्त्यांना "देशाच्या प्रगतीवर विश्वास नसलेल्या विघातक शक्तींची 'बी-टीम'" असे संबोधले आहे.
दरम्यान, सोनम वांगचुक यांच्या खालावत चाललेल्या प्रकृतीबद्दल अनेक राजकीय नेत्यांनी चिंता व्यक्त केली आहे. द्रमुक (DMK) खासदार कनिमोळी यांनी सोशल मीडियावर पोस्ट करत वांगचुक यांनी उपोषण मागे घ्यावे, असे आवाहन केले.
त्यांनी म्हटले की, NEET परीक्षेच्या पारदर्शकतेबाबत आणि जबाबदारी निश्चित करण्याबाबत त्यांनी उपस्थित केलेले प्रश्न अत्यंत महत्त्वाचे आहेत. मात्र, देशाला सोनम वांगचुक यांच्यासारख्या लोकांची गरज असून त्यांनी आपल्या आरोग्याची काळजी घ्यावी.
तसेच शिवसेना (उद्धव बाळासाहेब ठाकरे) पक्षाचे प्रमुख उद्धव ठाकरे यांनीही वांगचुक यांच्या आंदोलनाला पाठिंबा दर्शवला आहे. त्यांनी उपोषण मागे घेण्याचे आवाहन करत, शिक्षण व्यवस्थेतील पारदर्शकतेसाठी सुरू असलेल्या लढ्याला आपला पाठिंबा असल्याचे म्हटले. याशिवाय, 20 जुलै रोजीच्या मोर्चाला विरोधी पक्षांनी पाठिंबा द्यावा, असे आवाहनही उद्धव ठाकरे यांनी राहुल गांधींसह इतर नेत्यांना केले आहे.
सध्या त्यांच्या उपोषणाचा 17 वा दिवस सुरू असून प्रकृती खालावत असतानाही त्यांनी आंदोलन सुरू ठेवले आहे. या पार्श्वभूमीवर केंद्र सरकार या आंदोलनाबाबत पुढे कोणती भूमिका घेते, याकडे देशाचे लक्ष लागले आहे.
