PM Modi Facebook Video: दिल्लीतील जंतर-मंतर येथे झालेल्या CJPच्या (कॉकरोच जनता पार्टी) आंदोलनादरम्यान पंतप्रधान नरेंद्र मोदी यांनी युवकांना उद्देशून सोशल मीडियावर एक व्हिडिओ शेअर केला होता. मात्र, हा व्हिडिओ भारतात फेसबुकवर काही काळासाठी पाहता येत नव्हता. या प्रकारानंतर मेटाने ही कारवाई चुकून झाल्याचे सांगत आपली भूमिका स्पष्ट केली.
मिळालेल्या माहितीनुसार, पंतप्रधान मोदी यांनी सेल्फी मोडमध्ये रेकॉर्ड केलेला हा व्हिडिओ फेसबुकवर अपलोड केला होता. काही वेळानंतर तो भारतातील युजर्ससाठी मर्यादित करण्यात आला. व्हिडिओवरील "See Why" पर्यायावर क्लिक केल्यास, कायद्यानुसार हा व्हिडिओ मर्यादित करण्यात आला आहे, असा मेसेज दिसत होता.
या प्रकरणी माध्यमांनी विचारणा केल्यानंतर मेटाने स्पष्टीकरण देताना हा व्हिडिओ चुकून हटवला किंवा मर्यादित करण्यात आल्याचे सांगितले आणि ती त्रुटी नंतर दुरुस्त करण्यात आल्याचा दावा केला.
दिल्लीतील जंतर-मंतर येथे CJP च्या नेतृत्वाखाली अनेक दिवस आंदोलन सुरू होते. आंदोलनकर्त्यांनी तत्कालीन केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी केली होती. 20 जुलै रोजी संसदेकडे मोर्चा काढण्यात आला होता. त्यावेळी पोलिसांनी आंदोलनकर्त्यांना अडवल्याची घटना घडली होती.
याच पार्श्वभूमीवर पंतप्रधान मोदी यांनी युवकांना उद्देशून व्हिडिओ प्रसिद्ध केला होता. त्या व्हिडिओत त्यांनी पेपर लीकच्या घटनांकडे सरकारने गांभीर्याने पाहिल्याचे सांगत दोषींवर कारवाई करण्यात आल्याचा उल्लेख केला होता.
यानंतर पंतप्रधान मोदी यांनी आणखी एका व्हिडिओद्वारे परीक्षा व्यवस्थेत सुधारणा करण्यासाठी इन्फोसिसचे सहसंस्थापक नंदन नीलेकणी यांच्या अध्यक्षतेखाली टास्क फोर्स स्थापन करण्यात येणार असल्याची घोषणा केली होती. या कमिटीच्या शिफारशींची अंमलबजावणी करून परीक्षा प्रक्रिया अधिक पारदर्शक, विश्वासार्ह आणि तंत्रज्ञानाधारित करण्याचा सरकारचा प्रयत्न असल्याचे त्यांनी सांगितले.
