Brishti Mukherjee Death: पश्चिम बंगालच्या माजी मुख्यमंत्री आणि तृणमूल काँग्रेसच्या प्रमुख ममता बॅनर्जी यांची भाची बृष्टि मुखर्जी यांचा मंगळवारी मृत्यू झाला. बीरभूम जिल्ह्यातील रामपूरहाट येथील त्यांच्या घरातून त्यांचा मृतदेह आढळून आला. प्राथमिक माहितीनुसार, बृष्टि यांचा मृतदेह गळफास घेतलेल्या अवस्थेत आढळला.
बृष्टि मुखर्जी या निहार मुखर्जी यांच्या कन्या होत्या. त्यांचे वय 28 वर्षे होते. त्या बोलपूर येथील एका उच्च प्राथमिक शाळेत शिक्षकेतर कर्मचारी म्हणून कार्यरत होत्या.
मात्र, पश्चिम बंगालमधील बहुचर्चित शिक्षक भरती प्रकरणात न्यायालयीन कारवाईनंतर मार्च 2023 मध्ये त्यांची नोकरी गेली होती. राज्यातील सुमारे 26 हजार शिक्षक आणि शिक्षकेतर कर्मचाऱ्यांच्या नियुक्त्या चौकशी आणि न्यायालयीन प्रक्रियेनंतर रद्द करण्यात आल्या होत्या. या यादीत बृष्टि मुखर्जी यांचेही नाव होते.
पोलिसांनी बृष्टि मुखर्जी यांचा मृतदेह ताब्यात घेऊन शवविच्छेदनासाठी पाठवला आहे. त्यांच्या मृत्यूमागील नेमके कारण अद्याप स्पष्ट झालेले नाही. शवविच्छेदन अहवाल आल्यानंतर मृत्यूचे कारण स्पष्ट होण्याची शक्यता आहे. या प्रकरणाचा तपास पोलिसांकडून सुरू आहे.
बृष्टि मुखर्जी यांनी बोलपूर येथील उच्च प्राथमिक शाळेत शिक्षकेतर कर्मचारी म्हणून काम केले होते. मात्र, शिक्षक भरती घोटाळ्याच्या चौकशीनंतर न्यायालयाच्या आदेशाने त्यांची नियुक्ती रद्द करण्यात आली.
पश्चिम बंगालमध्ये सुमारे 26 हजार शिक्षक आणि शिक्षकेतर कर्मचाऱ्यांच्या नियुक्त्या रद्द करण्याचा निर्णय घेण्यात आला होता. या नियुक्त्यांमध्ये कथित गैरप्रकार आणि आर्थिक व्यवहार झाल्याचा आरोप होता. कलकत्ता उच्च न्यायालयाने नियुक्त्या रद्द करण्याचे आदेश दिल्यानंतर हे प्रकरण सर्वोच्च न्यायालयातही गेले होते.
बृष्टि यांचे वडील निहार मुखर्जी हे तृणमूल काँग्रेसचे स्थानिक नेते असल्याचे सांगितले जाते. न्यायालयाच्या निर्णयानंतर बृष्टि या तणावात होत्या, अशी माहिती सूत्रांकडून समोर आली आहे. नोकरी गमावलेल्या उमेदवारांच्या यादीत त्यांचे नाव 608व्या क्रमांकावर होते. मात्र, कुटुंबीयांच्या म्हणण्यानुसार, त्यांनी आरोग्याच्या कारणास्तव केवळ एक दिवस काम केल्यानंतर पदाचा राजीनामा दिला होता.
2016 मध्ये पश्चिम बंगाल स्कूल सर्व्हिस कमिशनने घेतलेल्या राज्यस्तरीय निवड परीक्षेतील भरती गैरव्यवहाराशी संबंधित हे प्रकरण आहे. नोकरी मिळवून देण्यासाठी पैशांची देवाणघेवाण आणि नियुक्त्यांमध्ये गैरप्रकार झाल्याचे आरोप या प्रकरणात करण्यात आले होते.
या प्रकरणात तत्कालीन शिक्षणमंत्री पार्थ चॅटर्जी, सत्ताधारी पक्षातील काही आमदार तसेच आयोग आणि शिक्षण मंडळातील वरिष्ठ अधिकाऱ्यांना अटक करण्यात आली होती. त्यांच्याविरोधात आरोपपत्रही दाखल करण्यात आले आहे.
दरम्यान, बृष्टि मुखर्जी यांच्या मृत्यूचे नेमके कारण अद्याप समोर आलेले नसून, पोलिस तपास आणि शवविच्छेदन अहवालानंतरच अधिक माहिती स्पष्ट होणार आहे.
