Harbhajan Singh Punjab drug political controversy
माजी क्रिकेटपटू आणि भाजप खासदार हरभजन सिंग यांनी पंजाबमधील ड्रग्जच्या मुद्द्यावरून राजकीय पटलावर जोरदार 'दुसरा' (ऑफस्पिनमधील हुकमी फिरकी चेंडू) फेकला आहे. त्यांनी शेअर केलेला आणि एका तरुणाला उघडपणे ड्रग्ज घेताना दाखवणारा वादग्रस्त व्हिडिओ पंजाबमधील जग्राव येथीलच असल्याचे राज्य पोलिसांनी स्पष्ट केले आहे.
भाजप नेते रवनीत सिंग बिट्टू यांनी एक्स (ट्विटर) वर पोस्ट केलेला व्हिडिओ रिट्विट करत हरभजन सिंग यांनी विरोधक आणि ट्रोल्सवर निशाणा साधला होता. "आता पेड ट्रोल्स जग्राव पूल हा राजस्थानमध्ये आहे असे घोषित करतील," असा टोला त्यांनी लगावला होता.
यापूर्वी हरभजन सिंग यांनी शेअर केलेला एक व्हिडिओ राजस्थानमधील असल्याचे तथ्य तपासणीतसमोर आले होते. त्यावेळी तो व्हिडिओ पंजाबमधील असल्याचा दावा करण्यात आल्याने मोठा विवाद निर्माण झाला होता. त्या पार्श्वभूमीवर पोलिसांचे हे ताजे स्पष्टीकरण अत्यंत महत्त्वाचे मानले जात आहे.पोलिसांनी दिलेल्या माहितीनुसार, हा व्हिडिओ जुना असू शकतो; मात्र जग्राव पुलाखाली ड्रग्ज घेताना दिसणाऱ्या त्या तरुणाला लुधियाना पोलिसांनी १२ ऑगस्ट रोजीच अटक केली आहे.
पंजाबमधील ड्रग्ज समस्येवरून सध्या सत्ताधारी आम आदमी पार्टी (आप) आणि विरोधकांमध्ये जोरदार शाब्दिक युद्ध सुरू आहे. विरोधक सोशल मीडियावरील अशा व्हिडिओंना हत्यार बनवून भगवंत मान सरकारला घेरण्याचा प्रयत्न करत आहेत, तर दुसरीकडे 'आप' सरकार ड्रग्ज नेटवर्क आणि माफियांविरोधात कडक कारवाई करत असल्याचा दावा करत आहे.
पंजाबची भौगोलिक रचना पाकिस्तान सीमेला लागून असल्याने ड्रग्ज तस्करांचे जाळे मोठे आहे. तस्कर आता ड्रोन, जीपीएस पेलोड आणि एन्क्रिप्टेड मेसेजिंगचा वापर करत आहेत. राज्य सरकार याविरोधात पुनर्वसन आणि अटकेची सत्रे राबवत असले, तरी मोठ्या ड्रग्ज नेटवर्क मूळापासून उखडणे हे अजूनही मोठे आव्हान ठरत आहे.
