Guwahati murder case : एका २५ वर्षीय विवाहितेची अत्यंत निघृणपणे हत्या करण्यात आल्याची अत्यंत धक्कादायक आणि थरारक घटना उघडकीस आली आहे. आसाममधील गुवाहाटी येथील वसिष्ठापूर भागात मारेकऱ्याने हत्येनंतर मृतदेहाचे मुंडके छाटून प्लास्टिकच्या पिशव्हीत गुंडाळून फ्रीजमध्ये लपवून ठेवले होते, तर हाताची बोटेही कापून टाकली होती. याप्रकरणी मृत महिला रिया तालुकदार गोस्वामी हिच्या पतीने स्वतःहून पोलीस ठाण्यात हजर होत गुन्ह्याची कबुली दिली आहे.
पोलीस सूत्रांनी दिलेल्या माहितीनुसार, गुवाहाटीतील एका फ्लॅटमधून प्रचंड दुर्गंधी येत असल्याचे शेजाऱ्यांच्या लक्षात आले. त्यांनी तातडीने पोलिसांना याची माहिती दिली. रविवारी रात्री पोलिसांनी फ्लॅटचा दरवाजा तोडून आत प्रवेश केला असता, समोरचे दृश्य पाहून पोलिसांच्याही अंगाचा थरकाप उडाला. रियाचा रक्ताळलेला मृतदेह छिन्नविछिन्न अवस्थेत पडला होता आणि तिचे छाटलेले मुंडके फ्रीजमध्ये साठवून ठेवले होते.
गुवाहाटी पोलिसांचे अप्पर उप-पोलीस आयुक्त (पूर्व) अनुराग शर्मा यांनी दिलेल्या माहितीनुसार, या हत्येप्रकरणी रियाचा पती रामानुजन गोस्वामी हाच मुख्य आरोपी आहे. घटनेनंतर त्याने स्वतःहून पोलिसांत हजर होवून हत्येची कबुली दिली. प्राथमिक तपासानुसार, हा हत्याकांड मृतदेह सापडण्याच्या सुमारे ४८ तास आधी घडला असावा असा अंदाज आहे.
रिया आणि रामानुजन यांचा विवाह अवघ्या सहा महिन्यांपूर्वीच झाला होता. त्यांनी फ्लॅट भाड्याने घेतला होता. पोलिसांनी घटनेच्या ठिकाणावरून हत्येसाठी वापरलेले धारदार शस्त्र जप्त केले आहे. मृतदेह उत्तरीय तपासणीसाठी गुवाहाटी मेडिकल कॉलेज अँड हॉस्पिटल (GMCH) येथे पाठवण्यात आला असून, हत्येमागील नेमके कारण काय होते, याचा शोध पोलीस सध्या घेत आहेत.
