FSSAI Dabur Action: देशातील आघाडीची FMCG कंपनी डाबर इंडियावर भारतीय अन्न सुरक्षा आणि मानक प्राधिकरणाने (FSSAI) मोठी कारवाई केली आहे. कंपनीने आपल्या काही खाद्यपदार्थांवर '100% प्युअर' असे लिहिले आहे. हे दावे दिशाभूल करणारे आहेत असं सांगत FSSAI ने संबंधित उत्पादनांची विक्री तात्काळ थांबवण्याचे निर्देश दिले आहेत. तसेच, कंपनीला 15 दिवसांच्या आत 'ॲक्शन टेकन रिपोर्ट' सादर करण्याचे आदेशही देण्यात आले आहेत.
FSSAI च्या निर्देशानुसार, डाबरच्या खालील उत्पादनांच्या विक्रीवर तात्पुरती बंदी घालण्यात आली आहे.
ऑर्गेनिक अॅपल सायडर व्हिनेगर
ऑर्गेनिक मध
होममेड नारळाचे दूध
तिळाचे तेल
गायीचे तूप
या उत्पादनांवर '100% Natural', '100% Pure', '100% Purity Guaranteed', '100% Organic' आणि '100% Tender Coconut Water' असे दावे करण्यात आले होते.
FSSAI च्या मते, अशा प्रकारचे दावे वैज्ञानिकदृष्ट्या सिद्ध करता येत नसल्यामुळे ग्राहकांची दिशाभूल होण्याची शक्यता आहे. त्यामुळे हे दावे Food Safety and Standards (Advertising and Claims) Regulations, 2018 चे उल्लंघन करणारे आहेत. नियामक संस्थेने स्पष्ट केले की, यापूर्वीही कंपनीला अशा दाव्यांबाबत नोटिसा देऊन ते मागे घेण्याच्या सूचना करण्यात आल्या होत्या.
FSSAI ने डाबरला संबंधित सर्व उत्पादनांची विक्री तात्काळ थांबवून 15 दिवसांच्या आत केलेल्या कारवाईचा सविस्तर अहवाल सादर करण्याचे निर्देश दिले आहेत.
FSSAI ने आणखी एक गंभीर आक्षेप नोंदवत, डाबर हिमालयन ऑर्गेनिक अॅपल सायडर व्हिनेगर आणि डाबर ऑर्गेनिक मध या उत्पादनांवर 'जैविक भारत' (Jaivik Bharat) लोगोचा वापर नियमांचे उल्लंघन करणारा असल्याचा आरोप केला आहे.
नियामक संस्थेच्या मते, हा प्रकार Food Safety and Standards (Organic Foods) Regulations, 2017 चे उल्लंघन असून, भ्रामक जाहिरात आणि ऑर्गेनिक प्रमाणपत्राच्या अनधिकृत वापराशी संबंधित आहे.
FSSAI ने ग्राहकांना उत्पादनांवरील दाव्यांवर अंधविश्वास न ठेवता, लेबलवरील माहिती, प्रमाणपत्रे आणि अधिकृत मान्यतांची पडताळणी करण्याचे आवाहन केले आहे.
दरम्यान, या कारवाईनंतर डाबरकडून अधिकृत प्रतिक्रिया येण्याची प्रतीक्षा असून, कंपनी पुढील 15 दिवसांत FSSAI ला आपला अहवाल सादर करणार आहे.
