Uttarkashi Helicopter Crash
उत्तराखंडच्या उत्तरकाशी जिल्ह्यातील गंगनानीजवळ गुरुवारी सकाळी हेलिकॉप्टर कोसळले. या दुर्घटनेत ६ यात्रेकरूंचा मृत्यू झाला. या हेलिकॉप्टरमधून सुमारे सात जण प्रवास करत होते. त्यापैकी ६ जणांचा मृत्यू झाला असून एकजण गंभीर जखमी झाला आहे. मृतांमध्ये मुंबईतील ४ आणि आंध्र प्रदेशमधील एकाचा समावेश आहे. घटनास्थळी बचावकार्य सुरु आहे.
उत्तरकाशीतील गंगनानीजवळ झालेल्या हेलिकॉप्टर अपघातात काही लोकांचा मृत्यू झाल्याची माहिती मिळाली. ही दुःखद घटना आहे. मदत आणि बचावकार्यासाठी एसडीआरएफ आणि जिल्हा प्रशासनाची पथके तात्काळ घटनास्थळी दाखल झाली, असे उत्तराखंडचे मुख्यमंत्री पुष्कर सिंह धामी यांनी X वरील पोस्टमध्ये म्हटले आहे.
या अपघाताची चौकशी करण्याचे निर्देश प्रशासनाला देण्यात आले आहेत. या संदर्भात, आपण अधिकाऱ्यांशी सतत संपर्कात असून येथील परिस्थितीवर लक्ष ठेवून असल्याचे त्यांनी नमूद केले आहे.
या हेलिकॉप्टरने डेहराडूनमधील सहस्त्रधारा हेलिपॅडवरून उड्डाण केले होते. ते यमुनोत्री मंदिराजवळील खरसाली हेलिपॅडकडे जात असताना ही दुर्घटना घडली. या अपघातात पायलट कॅप्टन रॉबिन सिंह (गुजरात) यांचा मृत्यू झाला आहे. यातील जखमी प्रवाशांना उपचारासाठी एअरलिफ्ट करून ऋषिकेश येथील एम्समध्ये नेण्यात आले.
मृतांमध्ये मुंबईतील चार यात्रेकरूंचा समावेश आहे. कला सोनी (६१), विजया रेड्डी (५७), रुची अग्रवाल (५६) आणि राधा अग्रवाल (७९) अशी त्यांची नावे आहेत. तर आंध्र प्रदेशातील वेदवती कुमारी (४८) यांचाही या अपघातात मृत्यू झाला आहे. तर आंध्र प्रदेशमधील भास्कर (५१) हे गंभीर जखमी झाले आहेत.
अपघाताचे नेमके कारण अद्याप समोर आलेले नाही, असे अधिकाऱ्यांकडून सांगण्यात आले आहे. ज्या ठिकाणी हा अपघात झाला ते ठिकाण एका गावाजवळील डोंगराच्या कडेला २००-२५० मीटर खाली दरीत आहे. एसडीआरएफ, लष्कर आणि पोलिसांकडून बचावकार्य सुरू आहे.
