हवामान विभागाच्या (NOAA) मते, मे महिन्यापासून 'एल निनो' येण्याची शक्यता वाढणार आहे. ही शक्यता साधारणपणे ५८ ते ६१% इतकी आहे.
Climate Alert 2026 | El Nino Impact on Monsoon
नवी दिल्ली: २०२६ च्या शेवटच्या सहा महिन्यांत 'एल निनो' येण्याची शक्यता आहे. ऑगस्ट ते नोव्हेंबर या काळात एल निनो येण्याची शक्यता ६० टक्के असल्याचा अंदाज हवामान विभागाने वर्तवला आहे. यापूर्वी हा अंदाज ५०% होता, मात्र आता त्यात वाढ झाली आहे. साधारणपणे 'एल निनो' सक्रिय असणार्या वर्षात भारतात पाऊस कमी पडतो आणि उन्हाळ्याचा तडाखा जास्त जाणवतो. हवामानाचा नवीन अंदाज देशातील बळीराजाची चिंता वाढविणार आहे.
कोलंबिया विद्यापीठ आणि नासा (NASA) यांच्या अहवालानुसार, पॅसिफिक महासागरातील 'ला निना'चा प्रभाव आता संपत चालला आहे. फेब्रुवारीच्या मध्यापर्यंत ही परिस्थिती निवळली आहे. फेब्रुवारी ते एप्रिल २०२६: 'ला निना' राहण्याची शक्यता फक्त ४ टक्के आहे. म्हणजेच, या काळात हवामान सामान्य स्थितीत राहण्याची शक्यता ९६ टक्के इतकी आहे. एप्रिल ते जून या कालावधीत ही शक्यता ६५ टक्के इतकी होईल, असे कोलंबिया क्लायमेट स्कूलच्या इंटरनॅशनल रिसर्च इन्स्टिट्यूटने १९ फेब्रुवारी रोजी स्पष्ट केले आहे.
हवामान विभागाच्या (NOAA) मते, फेब्रुवारी ते एप्रिल दरम्यान 'ला निना' संपून हवामान 'सामान्य' व्हायला सुरुवात होईल. याची शक्यता ६०% आहे. त्यानंतर, उत्तर गोलार्धात उन्हाळा संपेपर्यंत ही 'सामान्य' स्थिती कायम राहू शकते. या अहवालानुसार, मे महिन्यापासून 'एल निनो' येण्याची शक्यता वाढणार आहे. ही शक्यता साधारणपणे ५८ ते ६१% इतकी आहे. या काळात हवामान सामान्य राहण्यापेक्षा 'एल निनो'चा प्रभाव पडण्याची शक्यता जास्त आहे.
जागतिक हवामान संघटनेचा २० फेब्रुवारी रोजी प्रसिद्ध झालेल्या अहवालानुसार, मार्च ते मे २०२६ या काळात पॅसिफिक महासागराच्या तापमानात मोठे बदल होणार आहेत. सध्या समुद्राच्या पाण्याचे तापमान सरासरीपेक्षा कमी आहे, ज्याला आपण 'ला निना' म्हणतो; पण आता हे तापमान हळूहळू वाढू लागेल. याचाच अर्थ असा की, सध्याचा कमकुवत झालेला 'ला निना' आता पूर्णपणे संपून हवामान 'सामान्य' स्थितीकडे सरकणार आहे.
