Delhi Minor Assault Moving Bus
चुकीच्या थांब्यावर उतरल्यामुळे मुसळधार पाऊस आणि अंधारात अडकलेल्या १६ वर्षीय अल्पवयीन मुलीला मदतीचा बहाणा करून धावत्या स्लीपर बसमध्ये ओढून तिच्यावर सामूहिक अत्याचार करण्यात आल्याची धक्कादायक घटना उघडकीस आली आहे. पीडितेला तब्बल ४७ किलोमीटर फिरवून कश्मीरी गेट परिसरात सोडून आरोपी पसार झाले. या प्रकरणी पोलिसांनी चालक आणि वाहकाला अटक केली आहे.
पोलिसांनी दिलेल्या माहितीनुसार, उत्तर प्रदेश राज्यातील 16 वर्षीय मुलगी ५ ऑगस्ट रोजी कौटुंबिक वादातून घर सोडून नोएडामध्ये राहणाऱ्या तिच्या चुलत भावाला भेटण्यासाठी निघाली होती.
रात्रीच्या वेळी मुसळधार पाऊस आणि सर्वत्र अंधार असताना पीडित मुलगी चुकीने 'परी चौक' येथे उतरली. मदतीची गरज असल्याने तिने रस्त्यावरून जाणाऱ्या एका रिकाम्या स्लीपर ट्रॅव्हल्सला हात दाखवून थांबवले. गाडीचा चालक कुलदीप आणि वाहक संदीप यांनी ही बस नोएडा सेक्टर ६३ कडे जात असल्याचे सांगून तिला बस बसवून घेतले.
गाडी सुरू होताच वाहकाने मुलीशी अश्लील चाळे करण्यास सुरुवात केली. पीडितेने तीव्र विरोध केला असता आरोपींनी तिला जीवे मारण्याची धमकी दिली. चालक-वाहक या दोघांनी तिच्यावर आळीपाळीने अत्याचार केला. स्लीपर बसच्या बर्थला पडदे असल्याने गाडीत चाललेला हा प्रकार बाहेरून कोणाच्याही लक्षात आला नाही.
आरोपींनी बस कश्मीरी गेटच्या दिशेने जवळपास ४७ किलोमीटर पळवली. मध्यरात्रीच्या सुमारास त्यांनी पीडितेला कश्मीरी गेट बस टर्मिनसजवळील रिंग रोडवर रस्त्याच्या कडेला फेकून दिले आणि तेथून पळ काढला.
या भयानक प्रसंगातून सावरल्यानंतर घाबरलेल्या पीडितेने थेट कश्मीरी गेट पोलीस ठाणे गाठले. येथील अधिकार्यांना घटनेची माहिती दिली. पोलिसांनी तात्काळ तपासाची चक्रे फिरवत तिमारपूर येथील बस पार्किंगमधून चालक कुलदीप आणि वाहक संदीप या दोघांना बेड्या ठोकल्या. गुन्हा घडलेली स्लीपर बस जप्त करण्यात आली असून ती फॉरेन्सिक तपासासाठी पाठवण्यात आली आहे.
तपासात समोर आलेल्या माहितीनुसार, ही स्लीपर बस खराब झाल्यामुळे सूरजपूर येथील वर्कशॉपमध्ये दुरुस्तीसाठी नेण्यात आली होती. काम पूर्ण झाल्यानंतर आरोपी चालक आणि वाहक रिकामी बस घेऊन तिमारपूरकडे जात असतानाच परी चौक येथे ही मुलगी त्यांना आढळली आणि आरोपींनी हे भयंकर कृत्य केल्याचे प्राथमिक पोलीस तपासात स्पष्ट झाले आहे.
