दिल्ली मेट्रोमध्ये घडलेल्या एका घटनेमुळे प्रवाशांच्या सुरक्षेचा प्रश्न पुन्हा एकदा चर्चेत आला आहे. एका CISF जवानाने महिलेचे तिच्या परवानगीशिवाय फोटो काढल्याचा आरोप करण्यात आला आहे. त्यानंतर प्रवाशांनी जवानाला जाब विचारला असता त्याने सर्व्हिस पिस्तूल प्रवाशांच्या दिशेने रोखल्याचा आरोप आहे.
ही घटना रविवारी मध्यरात्रीच्या सुमारास AIIMS मेट्रो स्टेशनजवळ घडल्याचे सांगण्यात येत आहे. महिलेने जवानावर तिचे फोटो काढल्याचा आरोप केल्यानंतर काही प्रवाशांनी त्याच्याकडे मोबाईल देण्याची मागणी केली. यावेळी वाद वाढला.
वाद वाढल्यानंतर जवानाने आपले सर्व्हिस पिस्तूल प्रवाशांच्या दिशेने रोखल्याचा आरोप आहे. त्यानंतर तो मेट्रोच्या डब्यातून प्लॅटफॉर्मवर उतरला. त्यावेळीही त्याच्या हातात पिस्तूल असल्याचे सांगण्यात येत आहे.
या प्रकारामुळे मेट्रोमधील प्रवाशांमध्ये भीती निर्माण झाली. या घटनेचा एक व्हिडिओ सोशल मीडियावर व्हायरल झाला आहे. मात्र, व्हिडिओतील संपूर्ण घटनाक्रम आणि त्यामागील नेमकी परिस्थिती तपासानंतर स्पष्ट होणार आहे.
या घटनेबाबत रात्री सुमारे 12.40 वाजता पोलिसांना PCR कॉल आला. त्यानंतर पोलीस पथक AIIMS मेट्रो स्टेशनवर पोहोचले. पोलिसांनी दिलेल्या माहितीनुसार, संबंधित महिलेने या प्रकरणात औपचारिक तक्रार दाखल केली नाही. त्यानंतर CISF अधिकाऱ्यांना घटनेची माहिती देण्यात आली.
या घटनेची CISF ने गंभीर दखल घेतली आहे. संबंधित जवानाला तत्काळ निलंबित करण्यात आले असून या प्रकरणाची सविस्तर विभागीय चौकशी सुरू करण्यात आली आहे.
चौकशीमध्ये जे तथ्य समोर येतील, त्यानुसार पुढील कारवाई केली जाईल, असे CISF दिल्ली मेट्रोने सांगितले आहे. दरम्यान, या घटनेचा व्हिडिओ सोशल मीडियावर मोठ्या प्रमाणात शेअर केला जात आहे. तसेच प्रवाशांच्या सुरक्षेबाबत प्रश्न उपस्थित होत आहेत.
