Trinamool Congress : 'ऑपरेशन सिंदूर'वरील सर्वपक्षीय शिष्टमंडळात तृणमूल काँग्रेसचे प्रतिनिधि म्हणून केंद्र सरकारने माजी क्रिकेटपटू व पक्षाचे खासदार युसूफ पठाण यांची निवड केली होती; पण आता तृणमूल काँग्रेसने त्‍यांच्‍या जागी पक्षाच्या सर्वोसर्वा ममता बॅनर्जी यांचे भाचे अभिषेक बॅनर्जी यांची वर्णी लावल्‍याचे वृत्त आहे. अभिषेक हे पक्षात दुसऱ्या क्रमांकाचे नेते मानले जातात.
पहलगाम दहशतवादी हल्ल्याला प्रत्युत्तर म्हणून भारताने पाकिस्‍तानमध्‍ये घुसून 'ऑपरेशन सिंदूर' राबवले. आता जागतिक पातळीवर दहशतवादाचा सामना करण्याचा भारताचा संकल्पाची मांडणी करावी, यासाठी केंद्र सरकारने रविवारी सात शिष्‍टमंडळांच्‍या सदस्‍यांची नावे जाहीर केली होती. यामध्‍ये विविध पक्षांचे राजकीय नेते, खासदार आणि माजी मंत्री यांचा समावेश आहे. केंद्र सरकारने खासदार आणि माजी क्रिकेटपटू युसूफ पठाण यांना जेडीयूचे संजय कुमार झा यांच्या नेतृत्वाखालील शिष्टमंडळात सामील केले होते.
केंद्राने स्थापन केलेल्या सर्वपक्षीय शिष्टमंडळापासून तृणमूल काँग्रेसचे खासदार युसूफ पठाण यांनी स्वतःला दूर ठेवले आहे. 'ऑपरेशन सिंदूर' बद्दल भारताचा संदेश देण्यासाठी परदेशात जाणाऱ्या शिष्टमंडळात केंद्र सरकारने पठाण यांचा समावेश केला होता. तृणमूल काँग्रेसमधील सूत्रांनी सांगितले की, माजी क्रिकेटपटू आणि बहरामपूरचे लोकसभा सदस्य यांनी शिष्टमंडळातून माघार घेण्याचा निर्णय घेतला आहे.
तत्पूर्वी, तृणमूल काँग्रेस संसदीय पक्षाचे नेते सुदीप बंदोपाध्याय यांना सरकारने शिष्टमंडळात सामील होण्यासाठी संपर्क साधला होता. तथापि, आरोग्याच्या कारणास्तव त्यांनी ही ऑफर नाकारली. पठाण यांनी हा निर्णय का घेतला हे सूत्रांनी सांगितले नाही; परंतु केंद्राने शिष्टमंडळांसाठी पक्षाच्या उमेदवाराचा निर्णय घेऊ नये, असे तृणमूल काँग्रेसचे राष्ट्रीय सरचिटणीस अभिषेक बॅनर्जी यांनी सोमवारी म्‍हटले होते. तृणमूल काँग्रेसच्या प्रमुख ममता बॅनर्जी यांनी सोमवारी परराष्ट्र व्यवहारांवर केंद्र सरकारला आपला पक्ष पाठिंबा देत असल्याचे पुन्हा एकदा सांगितले. पाकिस्तान पुरस्कृत दहशतवादाला तोंड देण्याबाबत भारताची भूमिका अधोरेखित करण्यासाठी बहुपक्षीय राजनैतिक मोहिमेवर पक्ष बहिष्कार टाकत नसल्याचे सांगितले. केंद्राकडून औपचारिक विनंती मिळाल्यानंतर ते आपला प्रतिनिधी पाठवेल.
ममता बॅनर्जी म्हणाल्या की, संसदीय पक्ष संसदेत विधेयकांवर चर्चा करतो. ते संसदेशी संबंधित निर्णय घेते आणि तेही पक्षाशी सल्लामसलत केल्यानंतर. मी लोकसभा आणि राज्यसभेतील संसदीय पक्षाचा नेता आहे. आम्हाला कधीही माहिती दिली जात नाही. जर त्यांनी आम्हाला कळवले तर आम्ही आमचा प्रतिनिधी नक्कीच पाठवू. आपण ते का पाठवू नये? इथे वादाचा मुद्दाच नाही. आम्ही पूर्णपणे सरकारसोबत आहोत. दरम्यान, अभिषेक बॅनर्जी म्हणाले की, कोण कोणत्या पक्षाचे प्रतिनिधित्व करेल हे केंद्र एकतर्फी ठरवू शकत नाही. हे संबंधित पक्षाच्या नेतृत्वाने ठरवायचे आहे. ते म्हणाले की जर तुम्ही एका प्रतिनिधीची मागणी केली तर आम्ही तुम्हाला पाच नावे देऊ. परंतु केंद्रानेही आपले चांगले हेतू दाखवून सर्व विरोधी पक्षांशी व्यापक सल्लामसलत करण्याची गरज आहे.
पहलगाम दहशतवादी हल्ल्याला प्रत्युत्तर म्हणून भारताने पाकिस्‍तानमध्‍ये घुसून 'ऑपरेशन सिंदूर' राबवले. आता जागतिक पातळीवर दहशतवादाचा सामना करण्याचा भारताचा संकल्पाची मांडणी करावी, यासाठी केंद्र सरकारने रविवारी सात शिष्‍टमंडळांच्‍या सदस्‍यांची नावे जाहीर केली आहेत. शिष्टमंडळाचे नेतृत्व बैजयंत पांडा, रविशंकर प्रसाद (दोन्ही भाजप), संजय कुमार झा (जेडीयू), श्रीकांत शिंदे (शिवसेना), शशी थरूर (काँग्रेस), कनिमोझी (द्रमुक) आणि सुप्रिया सुळे (एनसीपी-एसपी) करत आहेत. ते एकूण ३२ देशांना आणि बेल्जियममधील ब्रुसेल्स येथील युरोपियन महासंघाच्‍या मुख्यालयाला भेट देतील.
