पुढारी ऑनलाईन डेस्‍क : लोकसभा निवडणुकीदरम्यान वारसा कराचा प्रस्ताव मांडणारे सॅम पित्रोदा यांनी आता इलेक्ट्रॉनिक व्होटिंग मशीन (ईव्हीएम) वर सवाल उपस्‍थित केले आहेत. 'ईव्हीएम'मध्‍ये छेडछाड केली जाऊ शकते. ही प्रणाली चांगली नाही. पेपर बॅलेट पद्धतीने निवडणुका घेणे चांगले आहे, असे मत त्‍यांनी व्यक्त केले आहे.
सॅम पित्रोदा यांनी आपल्या X पोस्टमध्ये म्‍हटलं आहे की, "मी 60 वर्षांहून अधिक काळ इलेक्ट्रॉनिक्स, टेलिकॉम सारख्या क्षेत्रात काम केले आहे. मी ईव्हीएम प्रणालीचा पूर्ण अभ्यास केला आहे. मला विश्वास आहे की ईव्‍हीएममध्‍ये छेडछाड केली जाऊ शकते. ईव्हीएम प्रणाली चांगली नाही. पेपर बॅलेट पद्धतीने निवडणुका घेणे चांगले आहे. मतमोजणी करून विजय-पराजय ठरवणे ही सर्वोत्तम यंत्रणा आहे."
इलेक्ट्रॉनिक व्होटिंग मशीन (ईव्हीएम) हॅक होवू शकते. अमेरिकन राष्ट्राध्यक्षपदाच्या निवडणुका ईव्हीएमचा वापर करु नका, असा सल्‍ला जगातील सर्वात श्रीमंत उद्योगपती इलॉन मस्क यांनी सोशल मीडियाच्‍या माध्‍यमातून दिला आहे. मस्क यांची पोस्‍ट रिपोस्‍ट करत तसेच एका दैनिकातील ईव्हीएम संदर्भातील वृत्ताचा हवाला देत काँग्रेस नेते राहुल गांधी यांनी पुन्‍हा एकदा 'ईव्हीएम'च्‍या वस्‍तुनिष्‍ठतेवर सवाल केले आहेत.
राहुल गांधी यांनी आपल्या X पोस्टमध्ये म्‍हटलं हाेतं की, 'भारतातील ईव्हीएम एक "ब्लॅक बॉक्स" आहे . ते कोणालाही तपासण्याची परवानगी नाही. आमच्या निवडणूक प्रक्रियेतील पारदर्शकतेबाबत गंभीर चिंता व्यक्त केली जात आहे. जेव्हा संस्थांमध्ये उत्तरदायित्वाचा अभाव असतो, तेव्हा लोकशाहीची फसवणूक होते आणि फसवणूक होण्याची शक्यता वाढते.
राहुल गांधी यांनी आपल्या पोस्टमध्ये मुंबई घटनेच्‍या वृत्ताचाही हवाला दिला आहे. याप्रकरणी मुंबई पोलिसांनी मुंबई उत्तर पश्चिम लोकसभा मतदारसंघातील शिवसेना शिंदे गटाचे खासदार रवींद्र वायकर यांचे मेहुणे मंगेश पांडिलकर यांच्यावर ईव्हीएम प्रकरणी गुन्हा दाखल केला आहे. बंदी असतानाही मंगेश पांडिलकर यांनी मुंबईतील गोरेगाव निवडणूक केंद्रात मोबाईल फोन वापरल्याचा आरोप आहे.
पोलिसांनी पंडिलकर यांना मोबाईल फोन दिल्याप्रकरणी निवडणूक आयोगाच्या एका कर्मचाऱ्यावरही गुन्हा दाखल केला आहे, या प्रकरणी उत्तर पश्चिम मतदारसंघातून निवडणूक लढवणाऱ्या अनेक उमेदवारांच्या तक्रारी पोलिसांकडे आल्या होत्या. त्या आधारे हा गुन्हा दाखल करण्यात आला आहे. फेरमतमोजणीनंतर रवींद्र वायकर उत्तर पश्चिम मतदारसंघातून अवघ्या ४८ मतांनी विजयी झाले होते. यंदाच्‍या लोकसभा निवडणुकीतील महाराष्ट्रातील हा सर्वात कमी फरकाने विजय नोंदला गेला आहे.
जगातील सर्वात श्रीमंत उद्योगपती, टेस्ला आणि एक्स या कंपन्यांचे सीईओ एलन मस्क यांनी ईव्हीएम (EVM) बाबत खळबळजनक दावा केला आहे. इलेक्ट्रॉनिक व्होटिंग मशीन हॅक होऊ शकते, त्यामुळे ते काढून टाकले पाहिजेत", असे एलन मस्क (Elon musk) यांनी म्हटले आहे.
एक्स आणि टेस्लाचे सीईओ एलन मस्क यांनी X पोस्टमध्ये म्हटले आहे की, "आपण इलेक्ट्रॉनिक मतदान यंत्रे (EVM) काढून टाकली पाहिजेत, कारण ते मानव किंवा AI द्वारे हॅक होण्याचा धोका कमी अधिक प्रमाणात आहे". दरम्यान मस्क यांनी अमेरिकन निवडणुकांमधून देखील इलेक्ट्रॉनिक व्होटिंग मशिन्स (ईव्हीएम) काढून टाकण्याची मागणी केली आहे. अमेरिकेच्या अध्यक्षपदासाठी अपक्ष उमेदवार रॉबर्ट एफ. केनेडी ज्युनियरच्या पोस्टवर प्रतिक्रिया देताना मस्क यांनी ईव्हीएम संदर्भातील प्रतिक्रिया दिली आहे.
मुंबई उत्तर पश्चिम लोकसभा मतदारसंघात ईव्हीएम हॅक झाल्याच्या आरोपावर निवडणूक आयोगानेही उत्तर दिले आहे. रविवार, १६ जून रोजी पत्रकार परिषद घेवून निवडणूक निर्णय अधिकारी वंदना सूर्यवंशी यांनी सांगितले होते की, ईव्हीएम ही पूर्णपणे वेगळी गोष्ट आहे. हे कोणत्याही इलेक्ट्रॉनिक किंवा इंटरनेटशी कनेक्ट केलेले नाही. यामुळे ते हॅक करता येत नाही. याशिवाय, ते अनलॉक करण्यासाठी OTP आवश्यक असल्याचा दावाही खोटा आहे. दरम्यान, ईव्हीएमची बदनामी करणाऱ्यांवर कारवाई करावी, अशी मागणी भाजपने निवडणूक आयोगाकडे केली आहे.
