कोरोनाचे मी पुन्हा येईन सुरुच ! आता बोत्सवाना व्हेरिएंट जगावर लॉकडाऊनची टांगती तलवार ? - पुढारी

कोरोनाचे मी पुन्हा येईन सुरुच ! आता बोत्सवाना व्हेरिएंट जगावर लॉकडाऊनची टांगती तलवार ?

नवी दिल्ली; पुढारी ऑनलाईन

कोरोनाच्या बोत्सवाना व्हेरिएंट या नवीन प्रकारामुळे जगभरात पुन्हा एकदा टेन्शन वाढत चाललं आहे. दुसऱ्या लाटेसारखी परिस्थिती पुन्हा उद्भवू नये यासाठी जगभरातील सगळ्याच देशांकडून तयारी सुरू झाली आहे. या पार्श्वभूमीवर दिल्लीचे नायब राज्यपाल अनिल बैजल २९ नोव्हेंबरला बैठक घेणार आहेत. दरम्यान, एम्सने हा एक नवीन प्रकार असल्याचे म्हटले आहे. त्याकडे दुर्लक्ष करता येणार नाही.

कोरोनाच्या नव्या बोत्सवाना व्हेरिएंटने जगात पुन्हा एकदा खळबळ उडाली आहे. तज्ज्ञांनी हा प्रकार समजून घ्यायला सुरुवात केली आहे. तथापि, नवीन अवतार डेल्टापेक्षा वेगाने पसरतो असे त्यांना वाटते. तसेच ते लसीला सुद्धा चकवा देऊ शकतो म्हणजेच त्यावर लस कुचकामी ठरते. हा प्रकार दक्षिण आफ्रिकेत ओळखला गेला आहे. या पार्श्वभूमीवर भारत सरकारही सतर्क झाले आहे. दक्षिण आफ्रिका, बोत्सवाना आणि हाँगकाँगमधील प्रवाशांची कडक तपासणी करण्याचे निर्देश दिले आहेत.

बोत्सवाना व्हेरिएंट जगावर लॉकडाऊनची टांगती तलवार ?

या आठवड्यात प्रथमच, हा प्रकार दक्षिण आफ्रिकेत ओळखला गेला. हा स्ट्रेन बोत्सवानासह आसपासच्या देशांमध्ये पसरला आहे. पूर्णपणे लसीकरण झालेल्या लोकांनाही याची लागण झाली आहे. कोरोनाच्या नवीन प्रकाराचे नाव B.1.1529 आहे ज्याला ‘बोत्सवाना व्हेरिएंट’ असेही म्हटले जात आहे.

त्याच वेळी, एम्सच्या सेंटर फॉर कम्युनिटी मेडिसिनचे डॉ संजय राय यांनी सांगितले की, हा एक नवीन प्रकार आहे. आता ‘वेट अँड वॉच’चे धोरण अवलंबावे लागणार आहे. याबाबत गोष्टी पाहिल्या पाहिजेत. तो कितपत संसर्गजन्य आहे हे सध्या आपल्याला माहीत नाही. तथापि, अशी शक्यता आहे की ते आपल्या विद्यमान प्रतिकारशक्तीला बायपास करू शकते. तसे असेल तर ती गंभीर बाब आहे.

धोका लक्षात घेता, भारताने गुरुवारी दक्षिण आफ्रिका, बोत्सवाना आणि हाँगकाँगमधील प्रवाशांची कठोर तपासणी करण्यास सांगितले. मंत्रालयाने म्हटले आहे की, “व्हिसा निर्बंधांमध्ये अलीकडेच शिथिलता आणणे आणि आंतरराष्ट्रीय प्रवास सुरू करण्याच्या पार्श्वभूमीवर या प्रकारचा सार्वजनिक आरोग्यावर गंभीर परिणाम झाला आहे.”

त्याच वेळी, ब्रिटन, सिंगापूर आणि इस्रायलने दक्षिण आफ्रिका, बोत्सवाना आणि इतर चार आफ्रिकन देशांची उड्डाणे बंद केली आहेत. जर्मनी आणि इटलीनेही दक्षिण आफ्रिकेतून सर्वाधिक प्रवासावर बंदी घातली आहे. दक्षिण आफ्रिकेने ब्रिटनच्या निर्णयाला ‘घाई’चे पाऊल म्हटले आहे. त्यांनी या निर्णयावर टीका केली आहे.

हे ही वाचलं का ?

Back to top button