Uniform Civil Code : समान नागरी कायद्याच्या अनुषंगाने संसदीय समितीची आज महत्वपूर्ण बैठक

पुढारी वृत्तसेवा; नवी दिल्ली : समान नागरी कायद्याच्या (युसीसी) अनुषंगाने संसदीय समितीची सोमवारी (दि.३) महत्वपूर्ण बैठक होत असून,  या बैठकीकडे सर्वांचे लक्ष लागले आहे. भाजपचे राज्यसभा सदस्य सुशीलकुमार मोदी यांच्या अध्यक्षतेखाली कायदा आणि सुव्यवस्थेबाबतच्या संसदीय समितीमध्ये युसीसीवर विचारविमर्श होणार आहे. (Uniform Civil Code)

कायदा आयोग तसेच केंद्र सरकारच्या प्रतिनिधींना संसदीय समितीच्या बैठकीसाठी पाचारण करण्यात आले आहे. देशात समान नागरी कायदा लागू केला जाऊ शकतो का, अशी विचारणा करीत कायदा आयोगाने एका महिन्यांच्या आत धार्मिक संस्था व जनतेकडून मते मागविली होती. त्यानुसार आयोगाकडे मत नोंदविण्याची अंतिम तारीख 13 जुलै ही आहे. आयोगाने जारी केलेला मसुदा तसेच त्याचे युसीसीवर काय म्हणणे आहे, याची सविस्तर माहिती राजकीय पक्षांच्या प्रतिनिधीना संसदीय समितीच्या बैठकीत दिली जाणार असल्याचे सुशीलकुमार मोदी यांनी सांगितले आहे.

संसदीय समितीच्या बैठकीत 31 सदस्य खासदार सामील होणार आहेत. युसीसीच्या संदर्भात या सदस्यांचे मत जाणून घेतले जाईल व त्यावर खल केला जाईल. पंतप्रधान नरेंद्र मोदी यांनी अलीकडेच भोपाळमध्ये केलेल्या भाषणादरम्यान युसीसीचा उल्लेख केला होता. जर एक घर दोन नियमानुसार चालू शकत नाही तर एक देश दोन नियमानुसार कसा काय चालू शकतो, असा सवाल उपस्थित करीत त्यांनी समान नागरी कायद्याचे जोरदार समर्थन केले होते.