Odisha train tragedy | ओडिशाच्या बालासोरमधील रेल्वे दुर्घटनास्थळी सीबीआय पथक दाखल, चौकशी सुरु

पुढारी ऑनलाईन : ओडिशातील बालासोर येथील रेल्वे अपघातस्थळी आज मंगळवारी केंद्रीय अन्वेषण ब्युरो (सीबीआय) चे पथक चौकशीसाठी पोहोचले. रेल्वे अपघाताची सीबीआय चौकशी करण्याची शिफारस रेल्वे बोर्डाने रविवारी केली होती. त्यानुसार सीबीआयचे पथक सोमवारी रात्री बालासोरमध्ये दाखल झाले. सीबीआयचे पथक रेल्वे दुर्घटनेसंदर्भात संबंधित अधिकाऱ्यांकडून माहिती घेणार आहे. या संदर्भात सीबीआयने अद्याप कोणतेही अधिकृत वक्तव्य केलेले नाही. (Odisha train tragedy)

ओडिशातील बालासोर येथे झालेल्या तीन रेल्वे गाड्यांच्या भीषण अपघाताच्या चौकशीच्या अनुषंगाने सरकारने सीबीआयला पत्र लिहिले होते. त्यानुसार सीबीआयने चौकशीला सुरुवात केली आहे. दरम्यान, दुर्घटना स्थळावरुन परतलेल्या रेल्वे बोर्डाचे अध्यक्ष अनिलकुमार लाहोटी यांनी पंतप्रधान कार्यालयात जाऊन अपघाताबाबतची सविस्तर माहिती वरिष्ठ अधिकाऱ्यांना दिली. लाहोटी हे मंगळवारी पंतप्रधान नरेंद्र मोदी यांना भेटणार असल्याचे समजते.

२ जून रोजी झालेल्या रेल्वे अपघातात २७५ लोकांचा मृत्यू झाला होता. तर शेकडो लोक जखमी झाले होते. सदर प्रकरणाची सीबीआय चौकशी केली जाईल, असे रेल्वे मंत्री अश्विनी वैष्णव यांनी जाहीर केले होते. त्यानुसार चौकशीबाबत विचारणा करणारे पत्र सीबीआयला पाठवण्यात आले. तिकडे ओडिशा पोलिसांनी गुन्हा दाखल करून घेत तपासाला सुरुवात केली आहे.

दुर्घटनेसाठी रेल्वेचे कर्मचारी जबाबदार होते? की रेल्वेच्या सिग्नल व इलेक्ट्रॉनिक इंटरलॉकिंग प्रणालीत बिघाड करून घातपात घडवून आला, याचा सर्वप्रथम शोध घेतला जाणार आहे. अपघातात रेल्वेच्या चालकांची चूक नसल्याचे तसेच गाड्यांचा वेग मर्यादेबाहेर नसल्याचे प्रथमदर्शनी सांगण्यात आले होते. दरम्यान रेल्वेचे काही वरिष्ठ अधिकारी हा घातपाताचा प्रकार असल्याचा संशय खासगीत व्यक्त करीत आहेत. बोर्डचे अध्यक्ष लाहोटी यांनी अपघाताबाबतची सविस्तर माहिती पंतप्रधानांच्या मुख्य सचिवांसोबतच या कार्यालयातील वरिष्ठ अधिकाऱ्यांना दिली. पंतप्रधान मोदी यांना मंगळवारी भेटून त्यांनाही अहवाल सादर करणार आहेत. (Odisha train tragedy)

हे ही वाचा :

• Odisha Train Accident : ओडिशा रेल्वे अपघातातील १०१ मृतांची ओळख पटेना!
• Odisha Train Accident : सदोष रुळांमुळे 289 रेल्वे अपघात
• Odisha train tragedy | ओडिशातील रेल्वे अपघात मार्गावरील वाहतूक पूर्ववत, अश्विनी वैष्णव यांची माहिती