[web_stories title="true" excerpt="false" author="false" date="false" archive_link="true" archive_link_label="" circle_size="150" sharp_corners="false" image_alignment="left" number_of_columns="1" number_of_stories="5" order="DESC" orderby="post_date" view="circles" /]
पुढारी ऑनलाईन : कर्नाटक विधानसभा निवडणुकीसाठी काँग्रेसने ४३ उमेदवारांची तिसरी यादी जाहीर केली आहे. अथणी मतदारसंघातून माजी उपमुख्यमंत्री लक्ष्मण सवदी यांना तिकीट देण्यात आले आहे. कर्नाटकचे माजी मुख्यमंत्री सिद्धरामय्या यांना कोलार येथून तिकीट दिलेले नाही. त्यांच्याऐवजी काँग्रेसने कोथूर जी मंजुनाथ यांना उमेदवारी दिली आहे. सिद्धरामय्या यांनी वरुणा सोबतच कोलार येथून तिकीट देण्याची विनंती केली होती. पण काँग्रेसने त्यांची विनंती मान्य केलेली नाही. (Karnataka assembly elections 2023)
डीके शिवकुमार आणि जी परमेश्वर यासारख्या काही प्रमुख काँग्रेस नेत्यांनी सिद्धरामय्या यांना दोन ठिकाणांहून तिकीट दिले जात असल्याबद्दल नाराजी व्यक्त केली होती. काँग्रेसने तेरदाळ मतदारसंघातून अभिनेत्री ते राजकारणी असा प्रवास केलेल्या माजी मंत्री उमाश्री यांना तिकीट नाकारले आहे. त्याऐवजी सिद्धप्पा रामाप्पा कन्नूर यांना तेरदाळ मतदारसंघातून तिकीट देण्यात आले आहे. मात्र, पक्षाने अद्याप १५ जागांसाठी उमेदवार जाहीर केलेले नाहीत.
भाजपमधून बाहेर पडलेले कर्नाटकचे माजी उपमुख्यमंत्री लक्ष्मण सवदी यांनी नुकताच काँग्रेसमध्ये प्रवेश केला. अथणी मतदारसंघातून भाजपने तिकीट नाकारल्यानंतर लक्ष्मण सवदी यांनी १२ एप्रिल रोजी विधान परिषद सदस्यत्वाचा आणि भाजपच्या प्राथमिक सदस्यत्वाचा राजीनामा दिला होता. त्यानंतर त्यांनी काँग्रेसचा हात धरला. आता त्यांना काँग्रेसने अथणीतून उमेदवारी दिली आहे.
लक्ष्मण सवदी हे अथणीचे तीन वेळा आमदार राहिले आहेत. पण २०१८ मधील निवडणुकीत काँग्रेसचे उमेदवार महेश कुमठळ्ळी यांच्याकडून त्यांचा पराभव झाला होता. काँग्रेसमधील इतर नेत्यांसह कुमठळ्ळी नंतर भाजपमध्ये सामील झाले. यामुळे काँग्रेस-जेडीएस युती सरकार पडले आणि २०१९ मध्ये बी एस येडियुराप्पा यांच्या नेतृत्वाखाली सरकार सत्तेवर आले होते. भाजपने अथणीतून सवदी यांचे कट्टर प्रतिस्पर्धी आणि भाजपचे आमदार रमेश जारकीहोळी यांचे निकटवर्तीय असलेले कुमठळ्ळी यांना उमेदवारी दिली. यामुळे आता अथणीत महेश कुमठळ्ळी विरुद्ध लक्ष्मण सवदी असा सामना रंगणार आहे.
[web_stories title="true" excerpt="true" author="false" date="true" archive_link="true" archive_link_label="" circle_size="150" sharp_corners="false" image_alignment="left" number_of_columns="1" number_of_stories="1" order="DESC" orderby="post_date" view="list" /]
हे ही वाचा :
