दिल्ली भाजपचे अध्यक्ष आदेश गुप्ता यांचा राजीनामा

नवी दिल्ली, पुढारी वृत्तसेवा :  महापालिका निवडणुकीत पराभव झाल्याची जबाबदारी स्वीकारत दिल्ली प्रदेश भाजपचे अध्यक्ष आदेश गुप्ता यांनी रविवारी आपल्या पदाचा राजीनामा दिला. भाजपचे राष्ट्रीय अध्यक्ष जे. पी. नड्डा यांच्याकडे गुप्ता यांनी राजीनामा पाठविला असून, तो मंजूर करण्यात आला असल्याचे सूत्रांकडून सांगण्यात आले.

दिल्ली महानगरपालिकेच्या अलीकडेच झालेल्या निवडणुकीत भाजपला 250 पैकी केवळ 104 जागा जिंकता आल्या होत्या. दुसरीकडे अरविंद केजरीवाल यांच्या आम आदमी पक्षाने 134 जागा जिंकून महापालिकेवर कब्जा केला होता. ज्या राजेंद्र नगर भागात आदेश गुप्ता राहतात, तेथे भाजपला एकही जागा जिंकता आली नव्हती. आदेश गुप्ता राहत असलेल्या वॉर्ड क्रमांक 141 मध्ये आम आदमी पक्षाच्या आरती चावला यांनी विजय मिळवला होता.