गांधीनगर : गुजरात विधानसभा निवडणुकीसाठी (Gujarat Assembly Elections) इसुदान गढवी हे आम आदमी पक्षाचे (AAP) मुख्यमंत्रीपदाचे उमेदवार असणार आहे. इसुदान गढवी हे आम आदमी पक्षाचे (AAP) राष्ट्रीय संयुक्त सरचिटणीस आहेत. दिल्लीचे मुख्यमंत्री आणि आम आदमी पक्षाचे (आप) राष्ट्रीय संयोजक अरविंद केजरीवाल यांनी शुक्रवारी इसुदान गढवी यांची गुजरातमधील आगामी मुख्यमंत्रीपदाचे उमेदवार म्हणून घोषणा केली. गढवी हे माजी टीव्ही पत्रकार असून २०२१ मध्ये ते आपमध्ये दाखल झाले होते. गढवी हे आम आदमी पक्षाचे राष्ट्रीय सरचिटणीस आणि राष्ट्रीय कार्यकारिणीचे सदस्य आहेत. १० जानेवारी १९८२ रोजी गुजरातमधील द्वारका येथे जन्मलेल्या गढवी यांनी मीडिया प्रोफेशनल म्हणून काम केले आहे.
गढवी यांनी सुरुवातीला दूरदर्शनसाठी काम केले होते. नंतर पत्रकार म्हणून त्यांच्या कारकिर्दीत त्यांनी गुजरातच्या डांग जिल्ह्यातील जंगलतोडचा १५० कोटींचा घोटाळा उघडकीस आणला. यामुळे सरकारला दोषी आणि अधिकार्‍यांवर कारवाई करावी लागली होती.
गुजरातचा मुख्यमंत्रीपदाचा उमेदवार कोण असावा? यासाठी २९ ऑक्टोबर रोजी 'आप'ने लोकांना एसएमएस, व्हॉट्सअ‍ॅप, व्हॉईस मेल आणि ई-मेलद्वारे पक्षाशी संपर्क साधून आपले मत नोंदवण्याचे आवाहन केले होते. 'आप'च्या सूत्रांनी दिलेल्या माहितीनुसार, पहिल्या दिवशी सुमारे १५ लाख प्रवेशिका आल्या होत्या. आपल्या पसंतीच्या मुख्यमंत्रिपदाच्या उमेदवारासाठी गुरुवारी सायंकाळी ५ पर्यंत मतदान प्रक्रिया पार पडली होती.
हे ही वाचा :
