Nagpur Drown death: वाघापासून बचावले पण बंधाऱ्यात बुडाले; बापलेकाच्या मृत्यूने महाराष्ट्र हळहळला

नागपूर : वाघापासून बचावले पण पळताना जीव वाचविण्यासाठी बंधाऱ्यात उडी घेणाऱ्या बापलेकाचा मृत्यू झाला. ही घटना देवलापार वन परिक्षेत्रातील छाबारी गावालगतच्या लखन बंधारा येथे घडली. जीवन धर्मराज कोकोडे (वय ३५) व त्यांचा मुलगा जतिन (वय ७ दोन्ही रा. दुलाय), अशी मृतकांची नावे आहेत.

रविवारी (दि.१२) सकाळी जीवन, त्यांचा मुलगा जतीन व मेहुणा लखन बंधाऱ्यावर मासेमारीसाठी गेले. यादरम्यान लखनला वाघ येताना दिसला. त्याने आरडाओरड करीत जीवन यांना सतर्क केले. वाघ हल्ला करेल या भीतीने जीवन यांनी जतीनसह बचावासाठी बंधाऱ्यात उडी घेतली.

मात्र, चिखलात पाय अडकल्याने बाप लेक बंधाऱ्यात बुडाले. आरडाओरड करीत मेहून्याने गावाकडे धाव घेतली, गावकरी आले. जतिन तरंगताना दिसला, नंतर पोलिसांनी जीवन यांचाही मृतदेह बाहेर काढला.