नागपूर : एकीकडे उपमुख्यमंत्री अजित पवार यांचे सुपुत्र जमीन खरेदी प्रकरणात राजकीयदृष्ट्या चर्चेत असताना ‘पार्थ पवार आरोपी नाहीत, असे वक्तव्य महसूलमंत्री चंद्रशेखर बावनकुळे यांनी माध्यमांशी बोलताना केले.
बावनकुळे म्हणाले, प्राथमिक चौकशीत लिहून घेणारे आणि लिहून देणाऱ्यांवर गुन्हे दाखल झाले आहेत. पार्थ पवार यांचा यात समावेश नाही. अजितदादांनी याबाबत स्पष्ट भूमिका मांडली आहे. चौकशी पूर्ण होऊ द्यावी. ज्येष्ठ समाजसेवक अण्णा हजारे किंवा विरोधकांनी केलेल्या आरोपांपेक्षा आमच्या प्राथमिक अहवालावर आणि समितीच्या अंतिम रिपोर्टावर आधारित कारवाई केली जाईल, असेही बावनकुळे यांनी स्पष्ट केले.
महसूल खात्याला मिळालेल्या प्राथमिक अहवालानुसार तहसीलदार, मुद्रांक अधिकारी, दस्तऐवज तयार करणारे, कंपनीचा मालक, खरेदी-विक्री करणारे अशांवर गुन्हे दाखल केले आहेत. नोंदणीवेळी सही करणाऱ्यांवर पहिल्या टप्प्यात गुन्हा दाखल केला असून सखोल चौकशीनंतर आणखी गुन्हे नोंदवले जातील. दोषी आढळलेल्यांवर निलंबन आणि गुन्हे दाखल करण्याची कारवाई पूर्ण झाली आहे.विकास खारगे यांच्या अध्यक्षतेतील पाच सदस्यीय समिती एक महिन्यात अहवाल देईल, त्यानंतर अंतिम कारवाई होईल. यासंदर्भात अजितदादांनी स्पष्ट भूमिका घेतली आहे. चौकशी समिती कोणालाही सोडणार नाही. शंभर टक्के सखोल चौकशी होईल असा दावाही बावनकुळे यांनी केला.
सामाजिक कार्यकर्ते मनोज जरांगें यांनी केलेल्या गंभीर आरोपांची पोलिसांनी तातडीने चौकशी करून आवश्यक ती कारवाई करावी, अशी मागणी बावनकुळे यांनी केली. जरांगे यांनी केलेल्या आरोपांवर पोलीस तपास करतील आणि जे निष्पन्न होईल, त्यानुसार कडक कारवाई करावी. मला संपूर्ण माहिती नाही; पण ज्यांच्याकडे माहिती असेल किंवा ज्यांचा सहभाग असेल, त्यांच्यावर पोलिसांनी कठोर कारवाई केली पाहिजे. विशेषतः जरांगेंनी मोठे आरोप केले असल्याने चौकशी लवकरात लवकर सुरू होणे आवश्यक आहे. पोलिसांनी लक्ष देऊन कोण-कोण यामागे आहेत, याची चौकशी करावी. आरोप जितके गंभीर आहेत, तितकीच तपास प्रक्रियाही जलद आणि निष्पक्ष असली पाहिजे.
राज्यातील मराठा आरक्षण प्रश्नाच्या पार्श्वभूमीवर जरांगे यांच्या आरोपांमुळे निर्माण झालेल्या परिस्थितीला अधिक गांभीर्य प्राप्त झाले आहे .सरकारकडे या संदर्भात येणारी माहिती आणि अहवालांच्या आधारेच पुढील कारवाई केली जाणार आहे. शीतल तेजवाणी प्रकरणाबाबत प्राथमिक दृष्ट्या दोषींवर तातडीने कारवाई केली आहे, असे त्यांनी सांगितले.
