लोणंद; पुढारी वृतसेवा: लोणंद नगरपंचायतीच्या निंबोडी रोडवरील कचरा डेपोस रविवारी सायंकाळी लागलेल्या आगीत मशनरी जळून लाखोंचे नुकसान झाले आहे.
याबाबतची अधिक माहिती अशी की, लोणंद येथील निंबोडी रोडवर माजी नगरसेवक योगेश क्षीरसागर यांच्या जागेमध्ये नगरपंचायतीचा ओला व सुका कचरा जमा करून त्यावर प्रक्रिया करण्यात येत होते. या कचरा डेपोस रविवारी (दि.२२) रोजी सायंकाळच्या सुमारास अचानकपणे आग लागली. या आगीमध्ये ओला व सुका कचऱ्यावर प्रक्रिया करणाऱ्या नगरपंचायत व संबधीत ठेकेदाराच्या मशीनरी जळून खाक झाल्या आहेत. तर सुक्या कचऱ्यापासून बनविलेल्या मालाचेही मोठे नुकसान झाले.
कचरा डेपोस लागलेल्या आगीत सुमारे ४ ते ५ लाख रुपयाचे नुकसान झाल्याचा प्राथमिक अंदाज व्यक्त करण्यात आला आहे. तर कचरा डेपोस आग लागली की, कोणातरी लावण्यात आली याबाबत अनेक तर्क -वितर्क करण्यात येत आहे. संबधीत ठेकेदाराचा कचरा प्रक्रियेचा करार नुकताच संपला असून सध्या घंटागाडीमधुन जमा करण्यात येणारा कचरा दुसऱ्या जागेत तात्पुरत्या स्वरूपात टाकण्यात आला होता. या ठिकाणी शिल्लक राहिलेल्या कचऱ्याची विल्हेवाट लावण्यात येत होती. त्या कचऱ्याला आग लागली आहे.
आग लागल्याचे समजताच नगराध्यक्ष मधुमती पलंगे- गालिंदे, उपनगराध्यक्ष शिवाजीराव शेळके, नगरसेवक माजी नगरसेवक योगेश क्षीरसागर, राजेंद्र डोईफोडे, संदीप शेळके, निलेश शेळके, हर्षवर्धन शेळके, सुनील यादव यांनी घटनास्थळी भेट दिली. आगीमुळे झालेले नुकसानीबाबत लोणंद पोलीसात सोमवारी तक्रार देण्यात येणार असल्याचे सांगण्यात आले.
हेही वाचलंत का?
