कराड ; पुढारी वृत्तसेवा : रस्त्याकडेला उभ्या असलेल्या मालट्रकला कंटेनरने पाठीमागून धडक दिली. या अपघातात कंटेनर चालकासह आणखी एकजण ठार झाला. पुणे-बंगळूर राष्ट्रीय महामार्गावर कराड जवळ खोडशी गावच्या हद्दीत रविवारी (दि. 5) रात्री 11.30 वाजण्याच्या सुमारास हा अपघात घडला. कराड येथे झालेल्या अपघातात दोन्ही वाहनांचे मोठे नुकसान झाले आहे.
विश्वनाथन जगन्नाथन (वय 33, रा. वेलामपट्टी, अथूर-तामिळनाडू) व सुब्बराम सिरंगराम आर (वय 36, रा. विसू वसापुरम, आम्मापट्टी, तामिळनाडू) अशी अपघातात ठार झालेल्या कंटेनरमधील दोघांची नावे आहेत. याप्रकरणी मालट्रक चालक ए. के. सुनीलन (वय 51, रा. आतीकवील हाऊस, ता. पुमंगलम, केरळ) याच्यावर गुन्हा दाखल झाला आहे.
याबाबत पोलिसांनी सांगितले की, कोल्हापूरहून पुण्याच्या दिशेने निघालेला मालट्रक रविवारी रात्री 11.30 वाजण्याच्या सुमारास खोडशी गावच्या हद्दीतील हॉटेल आरोमासमोर थांबला होता.
त्याचवेळी पाठीमागून भरधाव वेगात आलेल्या कंटेनरवरील चालकाचा ताबा सुटल्याने कंटेनरची मालट्रकला पाठीमागून जोराची धडक बसली. हा अपघात एवढा भीषण होता की, कंटेनरमधील चालक आणि क्लिनर असे दोघेही केबिनमध्ये अडकून पडले होते. त्यापैकी एकजण जागीच ठार झाला होता.
अपघाताची माहिती मिळताच कराड शहर पोलिस ठाण्यातील अपघात विभागाचे हवालदार प्रशांत जाधव हे कर्मचार्यांसह तातडीने घटनास्थळी दाखल झाले. त्यांनी जखमीला कंटेनरच्या केबिनमधून बाहेर काढून उपचारार्थ वेणूताई चव्हाण उपजिल्हा रुग्णालयात हलविले. मात्र, उपचारापुर्वीच त्याचाही मृत्यू झाल्याचे डॉक्टरांनी सांगितले.
दरम्यान, महामार्गावर रात्रीच्या वेळी अंधारात मालट्रक उभा करून प्रवाशांच्या जिवितास धोका निर्माण केल्याप्रकरणी मालट्रकचा चालक ए. के. सुनीलन याच्यावर कराड शहर पोलिसात गुन्हा नोंद करण्यात आला आहे. हवालदार प्रशांत जाधव यांनी याबाबतची फिर्याद दिली आहे.
