कण्हेर : पुढारी वृत्तसेवा : सातारा-मेढा रस्त्यावर नुने (ता.सातारा) येथे दुचाकी व चारचाकीच्या अपघातात चिमुकल्यांसह बापाचा जागीच मृत्यू झाला.तर चारचाकीमधील एक युवक गंभीर जखमी झाला असून अपघातात दोन्ही गाड्यांचा चाककाचूर झाला आहे. या अपघातात कण्हेर येथील बापलेक ठार झाल्याने सर्वत्र हळहळ व्यक्त होत आहे.
कण्हेर येथील इसम आपल्या लहान मुलासह मंगळवारी रात्री 9 च्या सुमारास दुचाकीवरून गावाकडे येत होता. नुने येथील नंदीचा उतार याठिकाणी आले असता समोरून येणाऱ्या चारचाकीस ठोकर बसल्याने जागीच दोघेही ठार झाले. या अपघातात सुनिल रामचंद्र वाघमळे (वय 42) व त्याचा लहान मुलगा संस्कार (वय 9) हे दोघे जागीच ठार झाले आहेत.तर चारचाकीमधील एक युवक गंभीर जखमी झाला आहे. अपघातस्थळी रक्ताचा सडा व गाडीच्या पार्टचे तुकडे अस्ताव्यस्त पडले होते.अपघाताची माहिती कळताच घटनास्थळी कण्हेरसह परिसरातील लोकांनी पाहण्यासाठी गर्दी केली होती. या घटनेची माहिती सातारा तालुका पोलिसांना मिळताच घटनास्थळी पोलिस दाखल झाले होते. जखमींना उपचारार्थ रूग्णालयात दाखल करण्यात आले.
तसेच पोलिसांनी अपघातस्थळाचा पंचनामा करून मयतांना स्वविच्छेदनासाठी शासकीय रुग्णालयात दाखल करण्यात आले.अपघाताचा पुढील अधिक तपास पोलीस निरीक्षक विश्वजीत घोडके यांच्या मार्गदर्शनाखाली तालुका पोलिस करत आहेत.
हेही वाचा
