पनवेल : रिक्षा बंद पडली आहे असे सांगून रिक्षा चालकाने एका 36 वर्षीय महिलेवर चाकूने वार केल्याची घटना घडली. त्यानंतर रिक्षा चालकाने महिलेच्या अंगावरील सोन्याचे दागिने, मोबाईल फोन आणि रोख रक्कम चोरी करून तो पळून गेला. या प्रकरणी रिक्षा चालका विरोधात पनवेल शहर पोलीस ठाण्यात गुन्हा दाखल करण्यात आला.
संगीता भोईर या करंजाडे आर 3 येथे राहत असून त्या संध्याकाळी साडेसहाच्या सुमारास मार्केटमधून घरी येण्यासाठी गणेश स्वीट, उरण नाका, पनवेल येथील रिक्षा स्टॉप येथे आल्या. यावेळी एका रिक्षात त्या बसल्या. करंजाडे आर थ्री च्या दिशेने जात असताना करंजाडे आर फोर मधील सत्य ट्रायडेंट बिल्डिंगच्या बाजूला असलेल्या सर्विस रोडवरील नाल्याच्या ब्रिजवर आल्या असता रिक्षा चालकाने रिक्षा बंद पडली आहे
असे सांगून तो रिक्षातून खाली उतरला आणि रिक्षाला पाठीमागून धक्का मारतो असे बोलून तो रिक्षाच्या पाठीमागे गेला आणि पाठीमागून येऊन हातातील चाकूने संगीता भोईर यांच्या गळ्यावर वार केला. यावेळी स्वतःचा बचाव करण्यासाठी संगीता भोईर रिक्षातून खाली उतरल्या आणि पळण्याचा प्रयत्न करू लागल्या.
यावेळी त्या रिक्षा चालकाने तिच्या छातीवर आणि पायावर चाकूने वार केले आणि गळ्यातील मंगळसूत्र, चैन, मोबाईल आणि पैशांची पर्स जबरदस्तीने काढून घेऊन चिंचपाडा करंजाडे ब्रिजच्या दिशेने पळून गेला. या हल्ल्यात संगीता भोईर गंभीर जखमी झाले आहेत. रिक्षा चालकाने तीन लाख 71 हजार रुपयांचा ऐवज चोरून नेला. याप्रकरणी पनवेल शहर पोलीस अधिक तपास करत आहेत.
