मुंबई : राज्यातील सार्वजनिक विद्यापीठांशी संलग्न असलेल्या मान्यताप्राप्त अशासकीय अनुदानित महाविद्यालयांमधील सहायक प्राध्यापक संवर्गातील 5,012 रिक्त पदे भरण्यास शासनाने मान्यता दिली आहे.
उच्च व तंत्र शिक्षण मंत्री चंद्रकांत पाटील म्हणाले की, राष्ट्रीय शैक्षणिक धोरणाची अंमलबजावणी सुरू असताना विद्यार्थ्यांच्या शैक्षणिक गरजा पूर्ण करण्यासाठी आणि विद्यापीठ अनुदान आयोगाच्या (यूजीसी) निर्देशांनुसार प्राध्यापकांची रिक्त पदे भरणे आवश्यक होते. त्याच पार्श्वभूमीवर हा निर्णय घेण्यात आला आहे.
भरती प्रक्रियेबाबत शासनाने काही महत्त्वाच्या अटी व शर्ती निश्चित केल्या आहेत. या अंतर्गत 1 ऑक्टोबर 2025 रोजीच्या विद्यार्थी संख्येनुसार निश्चित झालेल्या कार्यभाराच्या आधारे ही 5 हजार 12 पदे भरली जाणार आहेत. संपूर्ण भरती प्रक्रिया पारदर्शक आणि निश्चित कालमर्यादेत पार पाडण्याची जबाबदारी उच्च शिक्षण संचालक (पुणे) तसेच विभागीय सहसंचालकांवर सोपविण्यात आली आहे, असेही ते म्हणाले.
