रोहे, पुढारी वृत्तसेवा : ज्येष्ठ अर्थतज्ञ, महाराष्ट्राचे सुपुत्र तथा देशाचे माजी अर्थमंत्री डॉ. चिंतामणराव देशमुख यांच्या स्मृतीप्रित्यर्थ रायगड जिल्ह्यातील रोहा तालुक्यातील जामगाव येथे 'डॉ. चिंतामणराव देशमुख जैव विविधता, वन व वनस्पती उद्यान' उभारण्यात येणार आहे. डॉ. सी. डी. देशमुख यांच्या कर्तृत्वाला साजेसा वन उद्यानाचा आराखडा सादर करण्याचे निर्देश उपमुख्यमंत्री अजित पवार (Ajit Pawar) यांनी आज (दि.२६) दिले. या प्रस्तावित वनउद्यानाच्या आराखड्याचे वनविभागाच्यावतीने सादरीकरण करण्यात आले.
उपमुख्यमंत्री अजित पवार (Ajit Pawar) यांच्या अध्यक्षतेखाली आज मंत्रालयात बैठकीचे आयोजन करण्यात आले होते. या बैठकीला महिला व बाल विकासमंत्री आदिती तटकरे, खा. सुनील तटकरे, वित्त विभागाचे अप्पर मुख्य सचिव नितीन करीर, नियोजन विभागाचे प्रधान सचिव सौरभ विजय, महसूल व वन विभागाचे प्रधान सचिव बी. वेणूगोपाल रेड्डी, उपमुख्यमंत्री कार्यालयाचे प्रधान सचिव आशिष शर्मा, नागपूरचे प्रधान मुख्य वनसंरक्षक शैलेश टेंभूर्णीकर (व्हिसीद्वारे), रायगडचे जिल्हाधिकारी डॉ. योगेश म्हसे (व्हिसीद्वारे) मुख्य वनसंरक्षक ठाणे के. प्रदिपा, रोहा-रायगडचे उपवनसंरक्षक आप्पासाहेब निकत आदी उपस्थित होते.
उपमुख्यमंत्री अजित पवार म्हणाले, भारतीय रिझर्व्ह बँकेचे पहिले गव्हर्नर, माजी केंद्रीय अर्थमंत्री, आंतरराष्ट्रीय ख्यातीचे अर्थतज्ज्ञ आणि कुशल प्रशासक, वनस्पतीशास्त्रज्ञ अशा अनेक आघाड्यांवर चिंतामणराव द्वारकानाथ ऊर्फ सी. डी. देशमुख यांनी आपल्या कर्तृत्वाचा ठसा उमटवला आहे. महाराष्ट्राच्या या थोर सुपुत्राच्या शतकोत्तर रौप्यमहोत्सवी जयंतीच्या औचित्याने त्यांच्या नावाने रायगड जिल्ह्यातील रोहा तालुक्यातील जामगाव येथे 'डॉ. चिंतामणराव देशमुख जैव विविधता, वन व वनस्पती उद्यान' उभारण्यात येणार आहे. त्यांची स्मृती जतन करण्यासाठी उभारण्यात येणाऱ्या या वन उद्यानाची उभारणी त्यांच्या नावाला आणि कर्तृत्वाला साजेसी करण्यात यावी, त्यासाठी दर्जेदार आराखडा तयार करण्यात यावा, असे निर्देश पवार यांनी दिले.
हेही वाचा
