Ketan Agarwal Murder Case: केतन अग्रवाल मृत्यू प्रकरणाने संपूर्ण महाराष्ट्र हादरला आहे. सुरुवातीला अपघात वाटणाऱ्या या घटनेने तपासादरम्यान धक्कादायक वळण घेतले. पोलिसांच्या प्राथमिक तपासानुसार, केतनचा मृत्यू हा अपघात नसून पूर्वनियोजित कटाचा भाग असल्याचा संशय व्यक्त करण्यात आला आहे. या प्रकरणात अटक करण्यात आलेल्या सिया गोयलसोबतच तिचा प्रियकर चेतन चौधरीही चर्चेत आला आहे. नेमका कोण आहे चेतन चौधरी? त्याची पार्श्वभूमी काय आहे? याची माहिती आता समोर येत आहे.
चेतन चौधरी हा पुण्यातील व्यावसायिक कुटुंबातील तरुण आहे. त्याचे वडील बाबूलाल चौधरी हे मार्केटयार्ड परिसरात ड्रायफ्रूट आणि किराणा व्यापाराशी संबंधित व्यवसाय करतात. 23 वर्षीय चेतनने बीबीएचे शिक्षण पूर्ण केले असून, गेल्या दोन वर्षांपासून तो वडिलांच्या व्यवसायात काम करत आहे.
व्यवसायासोबतच चेतनला क्रिकेटचीही विशेष आवड असल्याचे सांगितले जाते. तो स्थानिक पातळीवर क्रिकेट खेळत असून, भविष्यात रणजी क्रिकेटमध्ये खेळण्याचे त्याचे स्वप्न असल्याची माहिती समोर आली आहे.
पोलिस तपासातील माहितीनुसार, सिया गोयल आणि चेतन चौधरी यांची ओळख मार्केटयार्ड परिसरातील व्यावसायिक व्यवहारांमधून झाली. सुरुवातीला केवळ परिचय असलेल्या दोघांमध्ये हळूहळू संवाद वाढला. मोबाईल क्रमांकांची देवाणघेवाण झाली आणि त्यानंतर मैत्री अधिक घट्ट झाली. काळाच्या ओघात दोघे नियमित भेटू लागले. फिरणे, पार्ट्या आणि वैयक्तिक संवादातून त्यांच्यात प्रेमसंबंध निर्माण झाल्याचे तपासात समोर आले आहे.
सिया गोयल ही पुण्यातील उद्योजक प्रवीण गोयल यांची मुलगी आहे. ती सध्या बी.कॉम.चे शिक्षण घेत आहे. गोयल कुटुंबाचा ड्रायफ्रूट आणि मसाल्यांचा व्यवसाय असून, सियासाठी मार्केटयार्ड परिसरात केक आणि बेकरी उत्पादनांचा स्वतंत्र व्यवसायही सुरू करून देण्यात आला होता.
केतन अग्रवाल हा पुण्यातील बांधकाम व्यावसायिक विशाल अग्रवाल यांचा मुलगा होता. त्याने सिम्बायोसिसमधून बीबीएचे शिक्षण घेतल्यानंतर अमेरिकेतून उच्च शिक्षण पूर्ण केले होते. शिक्षण पूर्ण करून भारतात परतल्यानंतर तो वडिलांच्या बांधकाम व्यवसायात सहभागी झाला. काही काळापासून तो स्वतःच्या बांधकाम प्रकल्पांवरही काम करत होता. फेब्रुवारी महिन्यात केतन आणि सिया यांचा साखरपुडा झाला होता आणि नोव्हेंबरमध्ये त्यांचा विवाह होणार होता.
पोलिसांच्या प्राथमिक तपासानुसार, सिया आणि चेतन यांच्यातील संबंध हे या संपूर्ण प्रकरणाच्या केंद्रस्थानी आहेत. लोहगड किल्ल्यावर घडलेल्या घटनेनंतर सुरुवातीला अपघाताचा अंदाज व्यक्त करण्यात आला होता. मात्र सीसीटीव्ही फुटेज, मोबाईल लोकेशन आणि चौकशीतून मिळालेल्या माहितीनंतर तपासाची दिशा बदलली.
सध्या या प्रकरणाचा तपास सुरू असून, पोलिस विविध पुरावे आणि तांत्रिक माहितीची पडताळणी करत आहेत. न्यायालयीन प्रक्रिया पूर्ण होईपर्यंत सर्व आरोप हे केवळ तपासाचा भाग असून अंतिम निर्णय न्यायालयाकडूनच दिला जाणार आहे.
