सोमेश्वरनगर: ऑक्टोबर महिना सुरू होताच बारामती तालुक्याच्या पश्चिम भागात उन्हाचा तडाखा पुन्हा जाणवू लागला आहे. सकाळपासूनच उन्हाची तीव्रता वाढत असून, अंगातून घामाच्या धारा निघत असल्याने शेतकरी, शेतमजूर आणि नागरिक हैराण झाले आहेत.
बागायती पट्टा म्हणून ओळखल्या जाणाऱ्या या भागात आता पाण्याची टंचाईही हळूहळू जाणवू लागल्याने आगामी काळाबाबत शेतकऱ्यांमध्ये चिंता वाढली आहे. सध्या पश्चिम बारामती परिसरात बाजरी काढणीचे काम सुरू आहे. वाढत्या उन्हामुळे दुपारच्या वेळेत शेतात काम करणे कठीण होत असल्याने अनेक शेतकरी आणि मजूर सकाळच्या सत्रातच शेतीची कामे उरकण्याला प्राधान्य देत आहेत.
सोमेश्वर सहकारी साखर कारखान्याच्या पंचवार्षिक निवडणुकीच्या प्रचारालाही वाढत्या उन्हाचा परिणाम जाणवत आहे. निवडणुकीच्या रणधुमाळीत गावोगावी बैठका, मतदारांच्या भेटीगाठी आणि प्रचार फेऱ्या सुरू असून, दुपारच्या कडक उन्हामुळे प्रचाराचे वेळापत्रक बदलले जात आहे. सकाळी आणि सायंकाळी प्रचारावर अधिक भर दिला जात असून, दुपारच्या वेळेत प्रचाराला विश्रांती दिली जात आहे.
यंदा पावसाने अपेक्षित साथ दिलेली नाही. त्यामुळे बागायती भागातही पाण्याचे नियोजन करावे लागणार आहे. सध्या उपलब्ध पाण्यावर शेतीची कामे सुरू असली तरी पुढील काही महिन्यांत पाण्याची मागणी वाढणार आहे.
डिसेंबरपर्यंत दिलासा मिळण्याची अपेक्षा असली, तरी जानेवारी ते जून हा कालावधी शेतकऱ्यांसाठी आव्हानात्मक ठरणार आहे. त्यामुळे ऑक्टोबरच्या सुरुवातीलाच जाणवू लागलेली उन्हाची तीव्रता शेतकऱ्यांसाठी आगामी संकटाची चाहूल ठरत आहे.
