पुणे: केंद्रीय लोकसेवा आयोग अर्थात यूपीएससीमार्फत केंद्र सरकारच्या मंत्रालये आणि विविध विभागांमध्ये 200 हून अधिक पदांसाठी पदभरती राबविण्यात येणार आहे. या भरती मोहिमेमध्ये प्रादेशिक संचालक, प्रशासकीय अधिकारी, कनिष्ठ वैज्ञानिक अधिकारी, व्यवस्थापक, विभाग अधिकारी आणि इतर पदांचा समावेश आहे.
पात्र उमेदवार https://scholarships.gov.in या अधिकृत वेबसाइटद्वारे ऑनलाइन अर्ज करू शकतात. शैक्षणिक पात्रता, संबंधित अनुभव, भरती चाचण्या, मुलाखतींमधील कामगिरीवर आधारित निवड असणार आहे.
यूपीएससीने अनेक विभागांमध्ये रिक्त पदांची यादी जाहीर केली आहे. त्यामध्ये कृषी आणि शेतकरी कल्याण मंत्रालयाच्या अंतर्गत राष्ट्रीय सेंद्रिय आणि नैसर्गिक शेती केंद्रात प्रादेशिक संचालक (1 पद), संस्कृती मंत्रालयाच्या राष्ट्रीय अभिलेखागारात भारतीय वैज्ञानिक अधिकारी (2 पदे), संरक्षण मंत्रालयाच्या अंतर्गत नौदल मुख्यालयात, नागरी कार्मिक संचालनालयात प्रशासकीय अधिकारी ग्रेड-1 (8 पदे), संरक्षण मंत्रालयाच्या अंतर्गत त्याच संचालनालयात कनिष्ठ वैज्ञानिक अधिकारी (9 पदे), संरक्षण मंत्रालयाच्या कॅन्टीन स्टोअर्स विभागात व्यवस्थापक ग्रेड-1 / सेक्शन ऑफिसर (19 पदे), संरक्षण मंत्रालयाच्या नौदल मुख्यालयात वरिष्ठ डिझाइन अधिकारी ग्रेड-1 (बांधकाम) (4 पदे), संरक्षण मंत्रालयाच्या वैमानिक गुणवत्ता आश्वासन महासंचालनालयात वरिष्ठ वैज्ञानिक सहाय्यक (वैमानिक) (3 पदे), वैमानिक गुणवत्ता आश्वासन महासंचालनालयात वरिष्ठ वैज्ञानिक सहाय्यक (रासायनिक) (2 पदे), संगणक विज्ञान, अभियांत्रिकी (4 पदे) आणि विद्युत (2 पदे), पर्यावरण, वन आणि हवामान बदल मंत्रालयाच्या भारतीय प्राणिशास्त्र सर्वेक्षणात शास्त्रज्ञ ‘ब’ (4 पदे), आरोग्य आणि कुटुंब कल्याण मंत्रालयात डायलिसिस वैद्यकीय अधिकारी (2 पदे), दिल्ली सरकारच्या सिंचन आणि पूर नियंत्रण विभागात कार्यकारी अभियंता (स्थापत्य) / काम सर्व्हेअर (स्थापत्य) (1 पद), विभागांमधील इतर अनेक पदेदेखील भरतीसाठी खुली आहेत.(Latest Pune News)
इच्छुक उमेदवारांनी अर्ज करण्यासाठी अधिकृत वेबसाइटला https:///upsconline.gov. भेट द्यावी. संबंधित भरती लिंकवर क्लिक करावे आणि ऑनलाइन अर्ज भरावा. अलीकडील छायाचित्रासह आवश्यक कागदपत्रे अपलोड करावीत. त्यानंतर शुल्क भरून अर्ज सबमिट करावा. ऑनलाइन पोर्टल व्यतिरिक्त इतर कोणत्याही पद्धतीने केलेले अर्ज स्वीकारले जाणार नाहीत, असेही यूपीएससीमार्फत सांगण्यात आले आहे.
