पुणे: केंद्रीय लोकसेवा आयोग अर्थात यूपीएससीने कंबाइंड डिफेन्स सर्व्हिसेस २ परीक्षा २०२६चे अधिकृत वेळापत्रक जाहीर केले आहे. अधिकृत सूचनेनुसार ही परीक्षा रविवार, १३ सप्टेंबर रोजी एकाच दिवशी तीन वेगवेगळ्या सत्रांमध्ये घेतली जाईल.
या परीक्षेच्या माध्यमातून भारतीय लष्कर, नौदल, वायुसेना आणि ऑफिसर्स ट्रेनिंग अकॅडमीमध्ये अधिकाऱ्यांच्या पदांवर भरती केली जाते. उमेदवारांना आयोगाच्या अधिकृत संकेतस्थळावर संपूर्ण माहिती उपलब्ध आहे.
जाहीर झालेल्या वेळापत्रकानुसार इंग्रजीचा पेपर सकाळी ९ ते ११ वाजेपर्यंत, जनरल नॉलेजची परीक्षा दुपारी १२:३० ते २:३० वाजेपर्यंत आणि एलिमेंट्री मॅथेमॅटिक्सचा पेपर सायंकाळी ४ ते ६ वाजेपर्यंत होईल. प्रत्येक पेपर दोन तासांचा असेल. यूपीएससीने सीडीएस २ परीक्षेची अधिसूचना २० मे रोजी जारी केली होती, तर अर्ज स्वीकारण्याची अंतिम तारीख ९ जून ठेवली होती.
सीडीएस २ परीक्षेसाठी विविध अभ्यासक्रमांतर्गत एकूण ४५१ रिक्त जागा निश्चित करण्यात आल्या आहेत. यामध्ये इंडियन मिलिट्री अकॅडमी देहरादून, इंडियन नेव्हल अकॅडमी एझिमाला, एअर फोर्स अकॅडमी हैदराबाद आणि ऑफिसर्स ट्रेनिंग अकॅडमी चेन्नई यांचा समावेश आहे. पात्र उमेदवारांना ई-ॲडमिट कार्ड परीक्षा तारखेच्या आधीच्या आठवड्यातील शेवटच्या कामकाजाच्या दिवशी यूपीएससीच्या अधिकृत संकेतस्थळावरून डाऊनलोड करता येईल.
परीक्षेसाठी या आहेत सूचना
परीक्षा केंद्रावर प्रवेशाबाबतही यूपीएससीने स्पष्ट निर्देश दिले आहेत. परीक्षा सत्र सुरू होण्याच्या ३० मिनिटे आधी परीक्षा केंद्राचे प्रवेशद्वार बंद केले जाईल. त्यानंतर कोणत्याही उमेदवाराला प्रवेश दिला जाणार नाही. त्यामुळे उमेदवारांनी वेळेवर पोहोचण्याचा सल्ला दिला आहे. प्रवेशपत्राबरोबरच वैध फोटो ओळखपत्र सोबत घेणे बंधनकारक आहे. या परीक्षेमुळे संरक्षण दलातील अधिकाऱ्यांच्या भरतीला गती मिळेल. उमेदवारांनी अधिकृत वेबसाइट नियमित तपासत राहावे आणि सर्व मार्गदर्शक सूचनांचे काटेकोरपणे पालन करावे, असे यूपीएससीने आवाहन केले आहे.
