पुणे: संत तुकाराम महाराज यांची पालखी गुरुवारी (दि. ९ जुलै) पुण्यातील नाना पेठ येथील निवडुंगा विठोबा मंदिरात मुक्कामी विसावली. रात्री आरती झाल्यानंतर पुणेकरांनी दर्शनासाठी लांबच लांब रांगा लावल्या. असेच चित्र शुक्रवारीसुद्धा (दि. १०) दिसून आले.
दोन्ही पालख्यांच्या दर्शनासाठी पुणे शहरासह आजूबाजूच्या उपनगर आणि जिल्ह्यातील अनेक भाविकांनी शहराच्या मध्यवस्तीत प्रचंड गर्दी केली होती. त्यामुळे पोलिसांनी येथील मध्यवस्तीत जाणारे काही रस्ते वाहतुकीसाठी बंद केले होते.
असे असतानाही अनेक नागरिक आपल्या कुटुंबासह मध्यवस्ती बाहेर आपली वाहने पार्क करून पालख्या असलेल्या नाना पेठ, भवानी पेठ मंदिरांमध्ये दर्शनासाठी आवर्जून येताना दिसले. महापालिका व पोलिस प्रशासनाकडून पालख्यांच्या दर्शनासाठी शिस्तबद्ध नियोजन केल्याचे या वेळी दिसले.
मंदिराबाहेर कडक पोलिस बंदोबस्त लावला होता. दर्शनासाठी आलेल्या नागरिकांना रांगेत सोडण्यात येत होते. रांगेच्या नियोजनासाठी मंदिर परिसरात लोखंडी बॅरिकेड लावले होते. निवडुंगा विठोबा मंदिरात सकाळी ९ वाजता पाद्यपूजा झाली, विश्वस्तांच्या हस्ते आरती झाली. पोलिस आयुक्त अमितेशकुमार यांनी दर्शन घेतले. विविध अधिकारी आणि मान्यवरांनीही संत तुकाराम महाराजांच्या पादुकांचे दर्शन घेतल्याची माहिती मंदिर विश्वस्त विशाल धनवडे यांनी दिली.
आज सकाळी ७ वाजता पालखीचे होणार प्रस्थान
संत तुकाराम महाराजांच्या पालखीचा शुक्रवारी निवडुंगा विठोबा मंदिरात मुक्काम झाल्यावर ही पालखी शनिवारी (दि. ११) सकाळी ७ वाजता पुढील मुक्कामासाठी निघणार आहे. हडपसरमार्गे जात ही पालखी लोणी काळभोर येथे मुक्कामी राहणार आहे, असेही मंदिराचे विश्वस्त विशाल धनवडे यांनी या वेळी सांगितले.
