पुणे : पुढारी वृत्तसेवा : पुरंदर तालुक्यातील जेजुरी येथे 23 जुलै रोजी मुख्यमंत्री, उपमुख्यमंत्री यांच्या उपस्थितीत 'शासन आपल्या दारी' व जेजुरी विकास आराखडा भूमिपूजन कार्यक्रमाचे आयोजन करण्यात आले आहे. या कार्यक्रमासाठी लाभार्थी राज्य परिवहन महामंडळाच्या बसने व अन्य वाहनांनी मोठ्या प्रमाणात उपस्थित राहणार असल्याने वाहतूक कोंडी होऊ नये, यासाठी वाहतुकीत बदल करण्याचे आदेश जिल्हाधिकारी डॉ. राजेश देशमुख यांनी दिले आहेत. वाहतूक कोंडी होऊ नये म्हणून रविवारी (23 जुलै) पहाटे 5 वाजेपासून ते सायंकाळी 8 वाजेपर्यंत पुणे ते पंढरपूर राष्ट्रीय महामार्ग क्र. 965 आणि पुणे ते बारामती या मार्गावरील जड, अवजड व इतर वाहतूक बंद करून अन्य पर्यायी मार्गाने वळविण्यात येणार आहे.
असे आहेत पर्यायी मार्ग
जेजुरी पोलिस स्टेशन : सातारा, फलटण, लोणंद, बारामती येथून पुणे येथे जाण्याकरिता जेजुरी-सासवडकडे येणारी जड अवजड व इतर वाहतूक पूर्णपणे बंद करून त्यावरील वाहने ही निरा-मोरगाव-सुपा ते केडगाव चौफुलामार्गे पुणे-सोलापूर महामार्ग क्रमांक 65 वरून पुणे यामार्गे वळविण्यात येणार आहे. पुण्याकडून बारामतीकडे जाणारी वाहतूक पूर्णपणे बंद करून बेलसर-कोथळे-नाझरे सुपे-मोरगाव रस्तामार्गे बारामती-फलटण-सातारा यामार्गे वळविण्यात येणार आहे.
वडगाव निंबाळकर पोलिस स्टेशन : बारामती व निरा बाजूकडून जेजुरीमार्गे पुणे बाजूकडे जाणारी जड, अवजड व इतर वाहतूक पूर्णपणे बंद करून ती मोरगाव-सुपा-केडगाव चौफुलामार्गे पुणे-सोलापूर महामार्ग क्रमांक 65 वरून पुणे यामार्गे वळविण्यात येणार आहे.
सासवड पोलिस स्टेशन : पुणे बाजूकडून जेजुरीमार्गे फलटण-सातारा बाजूकडे जाणारी जड, अवजड व इतर वाहतूक पूर्णपणे बंद करून सासवड-नारायणपूर-कापूरव्होळमार्गे सातारा-फलटण किंवा सासवड-वीर फाटा-परिंचे-वीर-वाठारमार्गे लोणंद यामार्गे वळविण्यात येणार आहे.
हेही वाचा :
