मराठी वेब सीरिजचे जग मंदावले; ओटीटीवर थंड प्रतिसाद

पुणे : मराठी वेब सीरिजचा डंका मागील वर्षी सगळीकडे पाहायला मिळत होता, अगदी ओटीटीवरही वेब सीरिज गाजत होत्या. पण, गेल्या सहा महिन्यांपासून मराठी वेब सीरिजचे जग थंडावले आहे, नव्या सीरिजची निर्मितीही मंदावली आहे. ओटीटीकडून मिळणारा थंड प्रतिसाद, सीरिज बनविणे निर्मात्यांसाठी झालेली खर्चीक बाब, घटलेली प्रेक्षक संख्या अशा विविध कारणांमुळे सीरिजची निर्मिती घटली आहे. फक्त यू-ट्यूब चॅनेलपुरते सीरिजचे जग मर्यादित झाले आहे, येथेही नवीन सीरिजचे प्रमाण घटले आहे.

कोरोना काळानंतर मराठी वेब सीरिजचे जग रुळावर आले होते. नवीन सीरिजची निर्मिती होत होती आणि गेल्या वर्षी तर काही सीरिज ओटीटीवरही झळकल्या. परंतु, आताच्या घडीला सीरिज बनविणे खर्चीक झाल्याने सीरिज निर्मितीचे प्रमाणही कमी झाले आहे. ओटीटीकडूनही मराठी सीरिजला कमी प्रतिसाद आहे.  याविषयी वेब सीरिजचे दिग्दर्शक नितीन पवार म्हणाले, गेल्या काही महिन्यांपासून ओटीटीकडून सीरिजला कमी प्रतिसाद मिळत आहे. आर्थिक जोखीम पत्करणे दिग्दर्शक-निर्मात्यांना परवडणारे नसून, नवीन सीरिजची निर्मितीही कमी झाली आहे. काही निर्माते-दिग्दर्शक जोखीम पत्करुन यू-ट्यूबसाठी सीरिजची निर्मिती करत आहेत. हे चित्र पालटले पाहिजे, अशी अपेक्षा दिग्दर्शक-निर्माते आणि कलाकारांची आहे.