पुणे: सावित्रीबाई फुले पुणे विद्यापीठ आणि संलग्न महाविद्यालये, शैक्षणिक संस्थांना नवीन वर्षात अर्थात 2026 मध्ये 25 शासकीय सुट्ट्या मिळणार आहेत. रविवारच्या साप्ताहिक सुट्टीचा दिवस वगळता या सुट्ट्या असून, यातील महाशिवरात्र आणि दिवाळी लक्ष्मीपूजन या दोन सुट्या रविवारी आल्या आहेत. त्यामुळे विद्यार्थ्यांना पुढील वर्षातील सुट्यांचे नियोजन करता येणार असल्याचे स्पष्ट झाले आहे.
कोणत्याही शासकीय कार्यालयातील अधिकारी आणि कर्मचाऱ्यांना शनिवारी आणि रविवारी साप्ताहिक सुट्टी मिळत असते. परंतु त्याचबरोबर काही सार्वजनिक आणि शासकीय सुट्ट्या देखील असतात. सुट्टीच्या दिवशी संबंधित कार्यालयाचे किंवा महाविद्यालयाचे कामकाज बंद असते. विद्यापीठाच्या कार्यालयाला रविवार बरोबरच महिन्याच्या पहिल्या आणि तिसऱ्या शनिवारी सुट्टी असते.
त्यामुळे त्या दिवशी विद्यापीठाचे कामकाज बंद राहणार आहे. याव्यतिरिक्त महाविद्यालयांना उन्हाळी सुट्ट्यांबरोबरच दिवाळीदरम्यानही सुट्ट्या असतात. त्यामुळे पुढील वर्षी सर्वाधिक सुट्ट्यांचा आनंद घेता येणार आहे. विद्यापीठाच्या प्रभारी कुलसचिव डॉ.ज्योती भाकरे यांनी वर्ष 2026 मधील शासकीय सुट्ट्यांचे परिपत्रक जाहीर केले आहे.
10 सुट्या जोडून आल्यामुळे ’दीर्घ सुट्टी’चे नियोजन
साप्ताहिक रविवारच्या सुट्टीला जोडूनच सोमवार, शनिवार किंवा शुक्रवारी सुट्टी आल्यास ’दीर्घ सुट्टी’चे नियोजन केले जाते. यंदा तब्बल 10 सुट्ट्या अशा येणार असल्याने विद्यार्थ्यांसह प्राध्यापक आणि कर्मचाऱ्यांना फायदा होणार आहे. या 10 पैकी एक सोमवारी, तीन शनिवारी आणि सहा शुक्रवारी आल्या आहेत.
सावित्रीबाई फुले पुणे विद्यापीठाशी संलग्न महाविद्यालयाला संबंधित जिल्हाधिकाऱ्यांनी वेळोवेळी जाहीर केलेल्या सुट्ट्या लागू होतील. तसेच महाविद्यालय किंवा संस्थेला जाहीर सुट्ट्यांपैकी काही सुट्ट्या देता येणे शक्य नसल्यास त्या बदल्यात सोयीनुसार पर्यायी सुटी देता येणार असल्याचे विद्यापीठ प्रशासनाने स्पष्ट केले आहे.
