बारामती: स्थानिक स्वराज्य संस्था निवडणुकांच्या पार्श्वभूमीवर अनधिकृत मद्य वाहतूक रोखण्यासाठी राज्य उत्पादन शुल्क विभागाने मोठी कारवाई केली. या कारवाईत 6 लाख 97 हजार रुपये किमतीचा विदेशी दारूसाठा आणि एक चारचाकी वाहन जप्त करून दोघांना अटक करण्यात आले.
अधीक्षक अतुल कानडे यांच्या मार्गदर्शनाखाली बारामती विभागाच्या पथकाने ही कारवाई केली. रामसिंह मोहबतसिंह राजपूत आणि महिपालसिंह राजसिंह राजपूत अशी अटक करण्यात आलेल्या दोघांची नावे आहेत.
बारामती तालुक्यातील शिरवलीच्या हद्दीत सांगवी-बारामती रस्त्यावरील माळेगाव फाटा येथे ही कारवाई करण्यात आली. एमएच 01 बीएफ 8165 या वाहनाची तपासणी करण्यात आली. त्यात मध्य प्रदेशात विक्रीस परवानगी असलेली, मात्र महाराष्ट्रात प्रतिबंधित मद्याचा मोठा साठा आढळून आला.
एकूण 20 बॉक्स व वाहन जप्त करण्यात आले, तर वाहनातील रामसिंह व महिपालसिंह राजपूत या दोघांना अटक करण्यात आली.
या कारवाईत निरीक्षक शहाजी शिंदे, दुय्यम निरीक्षक सागर साबळे, मनोज होलम, गिरीशकुमार कर्चे, सहायक दुय्यम निरीक्षक गणेश जाधव, तसेच जवान निखिल देवडे, सुरेश खरात, सागर दुबळे आणि टी. एस. काळे सहभागी होते. गिरीशकुमार कर्चे हे पुढील तपास करीत आहे.
