Shirur Shooting Video: पुणे जिल्ह्यातील शिरूरमध्ये गोळीबाराच्या घटनेने एकच खळबळ उडाली. लाटेआळी आंबेडकर नगर परिसरात पहाटेच्या सुमारास अज्ञात व्यक्तींनी केलेल्या गोळीबारात एका तरुणाचा जागीच मृत्यू झाला. अचानक झालेल्या या घटनेमुळे परिसरातील नागरिकांमध्ये भीतीचे वातावरण निर्माण झाले आहे.
मिळालेल्या माहितीनुसार, हरी गंगावणे या तरुणाचा या हल्ल्यात मृत्यू झाला आहे. शुक्रवारी सकाळी साडेसहा वाजताच्या आसपास परिसरात गोळीबाराचा आवाज ऐकू आला. आवाजाच्या दिशेने नागरिकांनी धाव घेतली असता हरी गंगावणे गंभीर अवस्थेत रक्ताच्या थारोळ्यात पडलेला आढळून आला. गोळ्या लागल्याने त्याचा घटनास्थळीच मृत्यू झाल्याचे प्राथमिक तपासात समोर आले आहे.
गोळीबाराची माहिती मिळताच शिरूर पोलिसांनी तातडीने घटनास्थळी धाव घेतली. घटनेचे गांभीर्य लक्षात घेऊन वरिष्ठ पोलीस अधिकाऱ्यांनीही घटनास्थळी पाहणी केली. उपविभागीय पोलीस अधिकारी रवींद्र भोसले, पोलीस निरीक्षक विनोद पाटील यांच्यासह फॉरेन्सिक पथकाने घटनास्थळावरील पुरावे तपासले.
तपासादरम्यान घटनास्थळावर काही रिकामी काडतुसे पोलिसांच्या हाती लागली असून ती जप्त करण्यात आली आहेत. हल्लेखोरांनी नेमक्या कोणत्या कारणातून तरुणावर गोळीबार केला, याचा शोध आता पोलीस घेत आहेत.
हा हल्ला जुन्या वादातून किंवा वैमनस्यातून झाला आहे का, यासह इतर शक्यतांचाही पोलीस तपास करत आहेत. हल्लेखोरांची ओळख अद्याप स्पष्ट झालेली नसून त्यांचा शोध घेण्यासाठी पोलिसांकडून विविध पातळ्यांवर तपास सुरू आहे.
घटनेनंतर परिसरातील नागरिकांमध्ये मोठी चर्चा सुरू झाली असून, पहाटेच्या वेळी शहरात झालेल्या गोळीबारामुळे सुरक्षेचा प्रश्नही ऐरणीवर आला आहे. आरोपींचा माग काढण्यासाठी पोलिसांची पथके रवाना करण्यात आली असून, हरी गंगावणे यांच्या हत्येमागील नेमकं कारण तपासातून स्पष्ट होणार आहे.
