मंचर : कोकण दर्शन सहल करून संगमनेर (जि. अहिल्यानगर) येथे घरी जात असताना पुणे-नाशिक महामार्गावर एकलहरे (ता. आंबेगाव) गावच्या हद्दीत दोन एसटी बसची गुरुवारी (दि. 11) पहाटे धडक झाली. या अपघातात एसटी बसमधील 20 विद्यार्थी आणि 5 शिक्षक जखमी झाले.
श्वेता अभंग (वय 17), ईश्वरी करपे (वय 16), वर्षा राठोड (वय 18), अजय पवार (वय 18), प्रणव परदेशी (वय 16), अनुष्का कोरडे (वय 16), सार्थक अरगडे (वय 17), गणराज बांगर (वय 16), पूजा मुसळे (वय 16), दिव्या अरगडे (वय 16), भक्ती चितळे (वय 16), श्वेता सूर्यवंशी (वय 16), ईश्वरी कोकणे (वय 16), प्रीती खरात (वय 16), पूनम शिंदे (वय 16), प्रांशू तिवारी (वय 16), राहुल तळपे (वय 16), समाधान कांदळकर (वय 16), संजना कचेरिया (वय 17), अंकिता दिघे (वय 17) अशी जखमी झालेल्या विद्यार्थ्यांची नावे आहेत. तर भारती दळवी (वय 57), रूपाली सुपेकर (वय 49), गणेश गुंजाळ (वय 53), संतोष थोरात (वय 43), गणपत जोंधळे (वय 54) या शिक्षकांना देखील दुखापत झाली.
संगमनेर येथील भाऊसाहेब गुंजाळ पाटील सह्याद्री ज्युनिअर कॉलेज या विद्यालयाचे विद्यार्थी व शिक्षक एमएच 14 एमएच 1079 व एमएच 14 एमएच 0931 या दोन एसटी बसने कोकण सहलीसाठी गेले होते. सहलीवरून घरी परतत असताना गुरुवारी पहाटे सव्वापाच वाजण्याच्या सुमारास एसटी बस एकलहरे बायपासवर आल्या.
तेथे गतिरोधक असल्याने पहिल्या बसच्या चालकाने अचानक बेक दाबला. त्यामुळे मागील बसची जोरदार धडक बसली. या अपघातात दोन्ही बसचे मोठ्या प्रमाणात नुकसान झाले. बसमधील 42 विद्यार्थ्यांपैकी 20 विद्यार्थी आणि 5 शिक्षक किरकोळ जखमी झाले. त्यांच्यावर मंचर येथील खासगी रुग्णालयात उपचार सुरू आहेत.
दरम्यान या अपघाताची माहिती मिळताच घटनास्थळी मंचर पोलिसांनी दाखल होत पंचनामा केला असून पुढील तपास सुरू आहे. तसेच भाजपचे नेते अरविंद वळसे पाटील, राष्ट्रवादी कॉंग्रेस पक्षाचे नेते सुहास बाणखेले यांनी विद्यार्थ्यांची भेट घेत त्यांना धीर दिला. मंचर एसटीचे आगार प्रमुख वसंतराव अरगडे आणि वाहतूक नियंत्रक मोहम्मद सलील सय्यद यांनी जखमींची भेट घेत प्राथमिक स्वरुपात प्रत्येकी 1 हजार रुपयांची मदत केली आहे.
